Read Batak Angkola MASMUR 91 Bible Online

MASMUR 91 - Batak Angkola bible

MASMUR 91

¹Sanga ise na marlinggom tu Na Gumincat i, jana maringanan di bagasan pangondian ni Na Markuaso i,

²tola ma dokkononna tu TUHAN, “Ho noma pangondianku dohot parlindunganku. Debatangku, haposan ni rohangku.”

³JagohononNia ma ho sian parmaraan na buni, sian sandok nyae na mambaen mate.

⁴SaonganNia ma ho dohot habongNia, gabe sonang ma ho di linggomanNia. Jagohonon jana ondihononNia ma ho marhite habonaranNia.

⁵Ulang pola mabiar ho baenon ni parmaraan borngin, sanga baenon ni na manyonggot di arian.

⁶Ulang sak rohamu baenon ni parmaraan na ro di golap-golap, sanga baenon ni hasesego na tompu di tonga ari.

⁷Haru rage saribu halak di lambungmu, jana sampulu ribu halak di humaliangmu, tapi anggo ho nada jabat mahua.

⁸Idaonmu sandiri do halak parjahat hona uhuman.

⁹Angke dibaen ho do TUHAN pangondianmu, dibaen ho Na Gumincat i parlindunganmu.

¹⁰Gabe nada hona bala be ho, bagasmu nada boluson ni tilako.

¹¹Angke madung ditonahon Ia surusuruanNia tu ho, anso dijagohon halahi ho di sude dalanmu.

¹²Jadi diabing halahi ma ho di tangan ni halahi, anso ulang tartuktuk patmu tu batu.

¹³Langkaanmu ma ulok dohot singa, degeonmu singa jara-jara dohot ulok na marbisa.

¹⁴Didok TUHAN, giot paluaonKu halak na mangkaholongi Au. OndinganKu ma sanga ise na mangoku Au gabe Tuhan.

¹⁵Muda pio-pio ia tu Au, alusanKu ma ia. Dompak masa hasusaan, urupanKu do ia, paluaonKu jana lehenonKu ma hasangapan disia.

¹⁶PapuasonKu ma ia dohot umur na ginjang, jana patuduhononKu tusia haluaan na sian Au.