Read Batak Angkola MASMUR 92 Bible Online

MASMUR 92 - Batak Angkola bible

MASMUR 92

¹Ende di Ari Sabat. Na denggan situtu do mandok tarimakasi tu Ho, ale TUHAN, jana marende masmur di Ho, ale Debata Na Gumincat;

²mamaritahon holong ni rohaMu di hatiha manyogot, dohot habonaronMu di hatiha borngin,

³lalu mamiltik gitar sisampulu tali, didongani gambus dohot hasapi.

⁴Angke dipamoga pambaenanMu do rohangku, marende jop ni roha au hara ni karejoMu.

⁵Ale TUHAN, na godang ma antong angka pambaenanMu, bagasna i antong angka pikiranMu!

⁶Anggo halak na bodo nada mangarti halak na oto nada mangastui,

⁷halak na so ture simbur do martumbur songon duhut simbur, jana halak na jahat martamba kayo jana sonang; tapi laing abiskonon do halahi sudena,

⁸angke markuaso do Ho, ale TUHAN, salolot-lolotna.

⁹Hami boto do na giot timpaskonon musuMu, ale TUHAN, sude halak na jahat giot dipasarsar.

¹⁰Dibaen Ho gogongku songon gogo ni lombu jonggi, jana dipasupasuhon Ho tu au hatuaan.

¹¹Madung huida musungku ditaluhon, madung hubege angguk ni angka halak na jahat.

¹²Martunas do partigor i songon bona ni kurma, tubu simbur songon bona ni sampinur di Libanon.

¹³Tudos do halahi tu hayu na disuan di Bagas Ni TUHAN, jana manyarmak di Bagas Ni Debatanta;

¹⁴angka hayu na sai tongtong rata jana togu, jana haru pe matobang laing marbatu.

¹⁵I ma da tandana na tigor TUHAN, Ia do pangondianku, nada adong hageduhan diSia.