Read Batak Angkola PODA 1 Bible Online

PODA 1 - Batak Angkola bible

PODA 1

¹On ma angka poda ni si Salomo anak ni si Daud, raja ni Israel.

²Tujuanna, i ma na laho mangurupi halak anso marbisuk, manjagit sipaingot na denggan, dohot mangastui angka pandohan na bagas artina.

³Diajari angka poda on do halak sanga na bia dalanna anso marngolu na bisuk, jujur, tigor dohot burju.

⁴Halak na hurang pangalaman diajari do gabe malo, jana halak na poso diajarisa gabe halak na marbinoto boti marbisuk.

⁵Marhite angka poda on, mur martamba do parbinotoan ni halak na bisuk, jana halak na pistar pe gabe dapotan panogu-noguon.

⁶Marhite dalan na songon i tardodo halahi ma bagasna arti ni poda jana botoonna ma alus ni angka na masa na nipatujolo ni angka halak na marbisuk.

⁷Laho maruli habisuhon angkon jumolo halak marpangkilalaan sangap dohot biar maradopkon TUHAN. Layas do roha ni halak na oto maradopkon habisuhon jana nada ra i niajaran.

⁸Parrohahon ma sanga aha pangajaran ni natorasmu tu ho, ale anakku,

⁹angke songon hiasan bunga-bunga do i di ulumu, jana songon borgok do i di rungkungmu na pajegeskon rupamu.

¹⁰Muda dielek-elek angka jolma pardosa ho, anakku, ulang ma ra ho.

¹¹Sugari sura didok halahi, “Beta tajalahi ma jolma jana tabunu. Beta ma marjop ni roha hita marhite na manyaroso halak na so marsala.

¹²Saonnari sonang jana sehat do halahi, tapi annon gabe songon na mate.

¹³Tarampas ma angka barang-barangna sigodang arga, jadi gabe gok ma bagasta dohot barang na nirampas.

¹⁴Beta dohot ma ho! Di hita do annon sude na dapot tartangko i!”

¹⁵Ulang ho kehe dohot angka jolma sisongon i, ale anakku! Padao ma dirimu sian halahi.

¹⁶Nada sombu roha ni halahi anggo so jolo mangkarejohon na jat. Sai na matua hobas do halahi laho mamunu.

¹⁷Salangkan unggas pe indangkan na masuk i tu bagasan jaring na dipagistang di jolo ni matana,

¹⁸hape anggo angka halak na jahat i, suhar-suhar ni i do. Dihuar halahi do lubang, jana halahi sandiri do na runcur tu bagasan lubang i.

¹⁹Songon i ma parngoluon ni jolma na sai manghagioti labo na so tingkos, angkon bayaronna do i dohot hosana sandiri.

²⁰Tangihon! Pio-pio do habisuhon di angka dalan dohot di angka tano lapang!

²¹Manggora-gora do i di angka pintu horbangan dohot di angka inganan parpungu-punguan.

²²Ninna do, “Ale hamu angka jolma na oto! Intap ni andigan do giotmunu sai tongtong maoto? Andigan pe ra hamu mantak palayaskon parbinotoan dohot na manulakkon pangajaran?

²³Patinggil ma pinggolmu muda hupaingot ho. Lehenonku ma sipaingot na denggan jana ajarkononku parbinotoan tu ho.

²⁴Madung hupiohon hamu jana huelek, hape dijua hamu do jana nada ra hamu manerge.

²⁵Dipasiding hamu do sude sipaingotku jana gora-gorangku ditulak hamu.

²⁶Hara ni i, muda mago hamu, partataanku ma hamu. Muda mabiar hamu, incahanku ma hamu.

²⁷Olo, incahanku ma hamu muda hancitan hamu jana mangae hara ni na hona parmaraan na ro songon halingsungsung.

²⁸Anggo di hatiha i, pio-pio ma hamu tu au tapi nada alusanku hamu. Jalahanmunu ma au sun tu dia, tapi nada dapot hamu be au.

²⁹Nada jungada porlu dihilala hamu parbinotoan. Sai na matua losok do rohamunu mangoloi TUHAN.

³⁰Nada unjung ra hamu manjagit angka sipaingotku sanga mamparrohahon angka gora-gorangku.

³¹Jadi, patunda ni angka parbuatanmunu i rasoanmunu ma i lopus gabe mardangol hamu.

³²Mate ma halak na so marpangalaman patunda ni na so ra manjagit au, jana magete ma halak na oto hara ni na so ra mangalehen rohana tu au.

³³Tapi anggo halak na manangihon au tarjamin do. Aman ngoluna jana nada porlu mabiar ia.”