Read Batak Angkola PODA 11 Bible Online

PODA 11 - Batak Angkola bible

PODA 11

¹Goyak do roha ni TUHAN di halak na mamake timbangan na geduk; tapi di timbangan na jujur do rohaNia sonang.

²Halak na bulbul, hona layas do i sanoli on; tapi jumpang do habisuhon di halak na toruk marroha.

³Halak na denggan ditogu hajujuronna; halak na sai margabus, dilantuk gabusna.

⁴Nada mararti sinadongan hatiha mangadopi uhum hamatean; angke hasintongan paluahon halak sian hamatean.

⁵Dalan ni halak na denggan dipahornop hajujuran, tapi halak na jahat maroban dirina tu hamagoan.

⁶Halak na jujur malua hara ni ias ni rohana; halak na so haposan, targompang hara ni songkalna.

⁷Mago do arop ni roha ni halak parjahat di hamateannia, jana nada marguna arop ni rohania i.

⁸Halak na daulat nada hona hasusaan halak na jahat sai hona ambatan.

⁹Disegoi hata ni halak parjahat do donganna jolma, tapi dipalua habisuhon do halak partigor.

¹⁰Jagar do kota muda marrasoki halak na jujur; muda mate halak na jahat, marsurak-surak halak na bahat.

¹¹Pasupasu na nijagit ni halak na jujur pajegeskon kota; hata ni halak na jahat manyegohonsa.

¹²Sanga ise na palayaskon donganna na bodo do i, tapi hohom do halak na pistar.

¹³Halak siginjang dila nada haposan maniop rahasia; tapi sanga ise na setia, i do na gabe pos ni roha.

¹⁴Masarsar do bangso muda nada adong pamimpinna; mur bahat panuturi, mur tarjamin amanna.

¹⁵Ulang nijanjihon manggarar utang ni na so nitanda. Gumonan indangkon sai mardais, ulang manyosal di pudi iba.

¹⁶Dadaboru na pardenggan basa dapotan hasangapan, halak na kejam palagutkon sinadongan.

¹⁷Maruntung do halak muda denggan rohana, tapi marugi do muda marroha na jat iba.

¹⁸Halak na jahat nada pasti hauntunganna; halak na denggan pasti pasupasuonna.

¹⁹Sanga ise na burju mambaen na denggan, marhangoluan, sanga ise na manggogo mambaen na jahat, kehe tu hamatean.

²⁰Halak na marroha na jahat dihagigihon TUHAN; dihaholongi Ia do halak na mambaen na denggan.

²¹Halak na jahat pasti dapot uhuman; halak na denggan marhaluaan.

²²Dadaboru na so marroha tapi jogi sarupa tu tintin sere do i di igung ni babi.

²³Hum parohon jop ni roha do hagiot ni halak partigor, tapi hagiot ni halak parjahat patubuhon hagigian.

²⁴Adong do halak na burju mangalehen tapi martamba kayo, adong do na sun hematna mur pogos.

²⁵Halak na mangalehen pasupasu, mur bahat manjagit pasupasu, halak na sai manolong, laing dapotan tolongan ia.

²⁶Na pagukguk gandum buraan ni halak ma, tapi tarpasupasu na manggadis gandum.

²⁷Pasangapon ni halak do sanga ise na ringgas mambaen na denggan na mangalapi parsoalan, dapotan hasusaan.

²⁸Na mangasahon sinadongan, madabu songon bulung na marulam; halak na daulat makombang songon tunas na haloyokanna.

²⁹Halak na manggaori rumahtanggana, agoan do di sasudena. Halak na oto, gabe hatoban ni na bisuk do.

³⁰Halak na daulat tarjamin do ngoluna; jolma na bisuk martamba do parkarejona.

³¹Dapotan upa do di tano on halak partigor. Jadi, pasti dapot uhuman do na jahat dohot pardosa.