Read Batak Angkola PODA 14 Bible Online

PODA 14 - Batak Angkola bible

PODA 14

¹Dadaboru na marroha mambangun rumahtanggana, tapi dirumpakkon haotoonna.

²Halak na jujur mabiar jana mangalehen sangap do tu TUHAN Debata; halak na so jujur palayaskon Ia.

³Hara ni bulbulna, sai tagi do halak na bodo manggodang diri; anggo halak na marroha diondihon hatana sandiri.

⁴Anggo so dohot lombu mangaluku, nada adong suha di ladang, dohot gogo ni lombu, suha ni gandum marlompit ganda.

⁵Saksi na jujur sai mandok na satutuna; saksi na so haposan, sai margabus do karejona.

⁶Dijalahi pangincak do habisuhon tapi nada dapot ia, tapi muda halak na pistar momo do marsiajar.

⁷Pasimbil ma halak na bodo, harana nada adong dapot parbinotoan sian i.

⁸Halak na marroha, denggan do tindakanna, angke dibotosa do sanga aha sibaenonna. Halak na oto, tindakanna pe oto do harana na paula-ula do ia mamoto.

⁹Halak na bodo nada parduli haru pe ia mardosa; halak na denggan por rohana dosana disesa.

¹⁰Jop ni roha dohot arsak nisimpan di bagasan andora; nada tarhilala halak na asing i songon pangkilalaanniba.

¹¹Bagas ni halak na denggan tong do togu, bagas ni halak na jahat marayak maronco.

¹²Adong do dalan diambang halak tu hangoluan, hapengani dalan laho tu hamatean.

¹³Di balik ni partataan betak adong do partangisan; sai intean do arsak muda dung sidung hamogaan.

¹⁴Halak na jahat mamutik batu ni hajahatan, halak na denggan mamutik batu ni hadengganan.

¹⁵Halak na oto porsaya do di sasudena, tapi anggo halak na bisuk diparrohahon do dalanna.

¹⁶Jamot do halak na bisuk jana dipasimbil do hajahatan, tapi muda halak na oto dipapuas do hagiotna jana jop rohana.

¹⁷Na bodo do halak na momo muruk, tapi sabar do halak na bisuk.

¹⁸Dijagit na bodo do suman tu habodoanna, tapi muda halak na pistar dapotan parbinotoan do i.

¹⁹Tunduk do halak na jahat tu halak na tigor marroha, laho mangido anso ibo nian rohana.

²⁰Halak na pogos nada dihajopkon, salang hombar bagasna; hape anggo halak na kayo bahat do donganna.

²¹Sanga ise na palayas halak, mambaen dosa; sanga ise marroha na denggan tu halak na pogos, martua.

²²Jagitonmu do pos ni roha dohot hasangapan muda dikarejohon ho na pade, tapi muda na jat do dikarejohon ho madung sala ho disi.

²³Marhite na marusaho gabe tarjamin ma ngolumu; muda juguk mangecet-ecet tu hapogoson ma ho madabu.

²⁴Tarpuji do halak na marroha hara ni habisuhonna; marlayas halak na oto hara ni haotoonna.

²⁵Muda didok saksi hata na tutu, na palua hosana ma ia; muda margabus ia, na manjehehon donganna ma ia.

²⁶Muda dipasangap TUHAN jumpang do dame ni roha, jana dongan sabagasna dapotan gogo marpangondian.

²⁷Pasangapkon TUHAN, i do haroroan ni ngolu; jana gabe malua do iba sian hamatean.

²⁸Hagodangan ni raja marguru tu bahat ni rayatna; anggo so adong rayat markuaso pe ia soada.

²⁹Halak na sobar bidang do pangastuionna, tapi halak parmuruk na pagodang haotoanna.

³⁰Roha na sonang pahoras pamatang; na mangiburu tarsongon nyae na maroban tu hamatean.

³¹Na pasangap Debatana do sanga ise na mambaen na denggan tu na pogos; na pabile na manompasa do halak na manyosak na gale.

³²Mate do halak na jahat hara ni jahat ni parbuatanna; tapi malua do halak na burju hara ni hadenggananna.

³³Halak na malo sai adong do bisuk di bagasan rohana; anggo di halak na bodo bisuk nada adong artina.

³⁴Hara ni hasintongan do bangso marmulia, tapi marlayas do bangso hara ni dosa.

³⁵Pagawe na malo dihasonangkon roha ni raja; tapi hona uhumna do na pailahon ia.