Read Batak Angkola PODA 15 Bible Online

PODA 15 - Batak Angkola bible

PODA 15

¹Alus na lambok paombun rimas alus na kasar patamba gilap.

²Muda mangkobari halak na marbisuk, ruar ma angka parbinotoannia, tapi muda na bodo mangkobari, ruar ma habodoon sajo.

³Diida TUHAN do sudena na tarjadi di sude inganan; diparrohahon Ia do sudena na denggan dohot na jat.

⁴Hata na denggan patamba semangat, hata na pahancit roha pagalehon roha.

⁵Ditulak na bodo do pangajarion ni amangna, tapi sanga ise na manangihon sipaingot, na bisuk do i.

⁶Sinadongan ni halak na denggan sai na hot do adong; sinadongan ni halak na jahat mago do hara ni hasusaan.

⁷Halak na bisuk jana na marroha do pabidang habisuhon, nada halak na bodo jana na so marparbinotoan.

⁸Sonang do roha ni TUHAN muda denggan halak martangiang, tapi anggo haul ni halak na jahat ditulak Ia.

⁹Magigi do TUHAN di dalan ni halak parjahat, tapi holong do rohaNia di halak partigor.

¹⁰Dokdok do uhuman tu halak na maninggalkon dalan na tutu, jana mate do halak na so tarpaingot.

¹¹Gari banua toru ungkap do di adopan ni TUHAN, dia ma he tartabunihon angka roha ni jolma?

¹²Halak na pangincahi nada ra i digorahon sanga didok hata; nada ra i mangido sipaingot sian halak na marroha.

¹³Muda marjop ni roha halak, mikim ia; tapi muda marsak, markaremut bohina.

¹⁴Halak na marroha manjalahi parbinotoan; halak na oto puas do di haotoan.

¹⁵Totop do susa ngolu ni na pogos, tapi sai marjop ni roha do halak na sonang.

¹⁶Gumonan do na miskin tapi mabiar tu TUHAN, ulang pado kayo mardongan sak ni roha.

¹⁷Dumengganan do mangan simarata dohot halak na nihaholongan, ulang pado mangan juhut na tabo rap dohot halak goyak ni roha.

¹⁸Halak parmuruk patubu partongkaran, halak na sobar maroban pardamean.

¹⁹Halak na losok sai na marpupu do i susa; halak na jujur nada adong hamaolonna.

²⁰Anak na marroha, pasonang roha ni amangna; anak na oto nada mangargahon inangna.

²¹Jop do roha ni na bodo di habodoon, tapi muda halak na bisuk dikarejohon ia do na sintong.

²²Jagit ma sipaingot olat ni na tolap, anso gabe karejomu, muda inda songon i nada manjadi karejomu.

²³Denggan ma da sude hata na dipajojor topet di hatihana!

²⁴Manaek tu hangoluan do dalan ni halak na bisuk, anso dao ia sian banua toru.

²⁵Rumpakkonon ni TUHAN do bagas ni halak siginjang roha, tapi diondihon Ia do sinadongan ni ina na mabalu.

²⁶Magigi do TUHAN mida sangkap ni halak pardosa, tapi hata na denggan pajop rohaNia.

²⁷Ro ma hasusaan tu keluarga ni halak na mambaen korupsi, tapi mangolu do sanga ise na margoyak ni roha di hepeng suap.

²⁸Dipikiri halak partigor do alusnia, tapi mopop do na bodo mangalehen alusnia jana mambaen susa do i.

²⁹Ditangihon TUHAN do muda martangiang halak na burju, tapi nada diterge Ia halak na so tontu.

³⁰Mata na marsinondang pasonang roha, jana barita na denggan pahoras daging.

³¹Na bisuk do halak na mangargahon hata gora.

³²Halak na so ra diajar, na so mangargai dirina sandiri; tapi sanga ise na manangihon dapotan habisuhon.

³³Biar maradopkon TUHAN, i ma ojahan ni pangajaran. Toruk ni roha manjoloi hasangapan.