Read Batak Angkola PODA 16 Bible Online

PODA 16 - Batak Angkola bible

PODA 16

¹Jolma mambaen rancangan, Debata do na mangalehen haputusan.

²Tigor do sude dalan ni halak di rohania sandiri, tapi TUHAN do manimbangi angka roha.

³Pangido ma TUHAN mamasumasu karejomu, gabe tulus ma sude sangkapmu.

⁴Dibaen TUHAN do sude hombar tu tujuanna; jana hamagoan do ujung ni parjahat.

⁵Dihagigihon TUHAN do sude halak siginjang roha; nada dipadiar halahi malua sian uhumanNa.

⁶Setia jana porsaya ma ho, gabe sesaon ma dosamu, jana oloi ma TUHAN anso dao ma hajahaton sian ho.

⁷Muda dipasonang ho roha ni TUHAN angka musumu dibaen Ia gabe dongan.

⁸Gumonan do marpandapotan otik mardongan hajujuron, ulang pado marpandapotan bahat mardongan panipuon.

⁹Bolas do jolma mambaen sangkap, tapi TUHAN do na patuluskon langkana.

¹⁰Muda raja mandok hata marhite kuaso ni Debata, jadi, nada sala ia di haputusan na nibaenna.

¹¹Giot ni TUHAN ulang so jujur halak di boniagana, songon i di na mamake ukuran dohot timbangan.

¹²Di na markuaso, jorbut do na mangkarejohon hajahatan, angke hara ni hatigoran do togu pamarentaanna.

¹³Jop do roha ni raja mambege hata na sintong, jana dihaholongi do na mandok na sintong.

¹⁴Halak na marroha diparayak do pasonang roha ni raja; muda muruk raja, ra do adong na mate hona uhumna.

¹⁵Hadengganan ni roha ni raja na pangoluhon do i, songon ombun na paijur udan patumonaan.

¹⁶Ummarga do dapotan habisuhon dohot parbinotoan, ulang pado dapotan sere dohot perak.

¹⁷Pasimbil hajahatan i do dalan na tutu, sanga ise na manjago dalanna, i do manjagohon hosana.

¹⁸Ginjang ni roha mambaen hasegoan; bulbul mambaen hasarsaran.

¹⁹Gumonan do toruk roha jana nada marsinadongan, ulang pado maniru halak na gakgak jana mangarasoi sinadonganna sian hageduhon.

²⁰Parrohahon ma pangajaran anso maruli pandapotan. Haporsayai ma TUHAN anso dapotan hatuaan.

²¹Nitanda do halak na marroha sian parbinotoanna. Hatana mur manarik, boti muse paposkon roha.

²²Halak na marroha maruli ngolu sian habisuhonna; tapi muda habodoon, sitaonon do i di na bodo.

²³Halak na marroha jolo marpikir anso mandok hata, i do umbaen na umpos roha di hatana.

²⁴Hata na burju tudos tu manisan; tonggi ma i jana pasehatkon pamatang.

²⁵Adong do dalan diambang halak laho tu hangoluan, hapengani dalan laho tu hamatean.

²⁶Paniak ni butuha do mamaksa anso laho karejo, angke giot pabutongonna do butuhana.

²⁷Dijalahi halak na jahat do dalan mangago na asing, hatana pe manjadi do marhite hajahatan.

²⁸Dibaen halak na jahat do parbadaan, jana disirang do halak na marale-ale.

²⁹Halak na kejam manipu donganna, jana mangago ale-alena.

³⁰Jamot ma ho maradopkon halak na mikim tu ho dohot na main mata, na mambaen sangkap jahat do i di bagasan rohana.

³¹Halak na jujur maruli umur na ginjang; ubanna i songon tuku na marsinondang.

³²Lumambat muruk dumenggan dope i sian na markuaso; mangarajai diri gumonan dope sian na patalu kota.

³³Dibaen halak do undi, tapi TUHAN do na manontuhon sude alusna.