Read Batak Angkola PODA 17 Bible Online

PODA 17 - Batak Angkola bible

PODA 17

¹Dumenggan do marsaulihon sipanganon na so sadia, tapi mardongan hasonangan, ulang pado marpesta di bagas na gok partangkangan.

²Hatoban na bisuk gabe markuaso do tu dakdanak na so hasaya, jana gabe dohot do ia mandapot pusako sian pusako ni dakdanak na so hasaya i.

³Sere dohot perak diuji di bagasan api, tapi anggo roha ni jolma TUHAN do manguji.

⁴Parjahat mangihutkon usul na jahat, pargabus mangihutkon gabus dohot ginjang ni dila.

⁵Sanga ise na manyosak halak na pogos, pabilehon Debata na manompasa. Sanga ise na marmoga-moga hara ni halak na malang bagian, pasti dapot uhuman.

⁶Jagar-jagar ni halak na matobang, i ma anak maradu pahompuna; jagar-jagar ni dakdanak, i ma simatobangna.

⁷Halak na marsangap nada paruar hata gabus halak na bodo nada mararga hata na nidokna.

⁸Adong do na mangetong tarbaen hepeng sogok halongangan; marhite hepeng sogok sasudena tarbaensa.

⁹Muda por rohamu dihalomohon dongan, angkon ampunanmu do hasalaanna. Mambuka-buka hasalaan hum na manggotap pardonganan.

¹⁰Ummarga do sanoli digorahon di halak na marroha ulang pado disambok saratus noli di halak na oto na so ra mangarti.

¹¹Di halak na jahat na sai patubu hagaoran, ro ma hamatean songon uhuman na kejam.

¹²Gumonan do marsuo dohot induk ni gompul na magoan anak, ulang pado marsuo dohot halak na bodo na topet padalan haotoanna.

¹³Sanga ise na mambalos hadengganan dohot na jat, sian bagasna pe nada morot be na jat.

¹⁴Songon na mambuka dalan ni aek do na mamungka partongkaran, manigor ma mundur painte so dipungka partongkaran i.

¹⁵Dihagigihon TUHAN do na patigorkon halak na so hasaya, jana na pasalahon halak na so marsala.

¹⁶Parcuma do halak na bodo pangabis hepeng manjalahi hapistaran, angke nada adong disia pikiran na torang.

¹⁷Sai na setia do ale-ale tu donganna; jana songon na markahanggi do halahi tu sitaonon.

¹⁸Hum halak na bodo do, na manjamini angka utang ni donganna.

¹⁹Halak na sai tagi martongkar hamaolon do na nihagiotanna. Halak siruak baba do na olo patida-tidahon, hagaoran dijalahisa.

²⁰Sada panipu indangkan na marhasonangan; halak sijuba-jabi mandapot parmaraan.

²¹Anak na bahat mambaen haotoan, mangalehen tu amangna bahat pardangolan.

²²Muda jop roha, sehat do pamatang. Muda gondok roha, marhancit ma badan.

²³Parkuaso na mangeldok, manjagit hepeng sogok di sihabunian; hara ni i gabe nada mardalan hatigoran.

²⁴Adop habisuhon do hagiot ni na pistar, tapi rarat do pangaligi ni na oto.

²⁵Anak na oto pasusa amangna, jana arsakkonon ni inangna.

²⁶Nada tola mandando halak na tigor, jana nada patut mamotuk halak na sangap.

²⁷Asok do mangkobari halak na pistar, jana torang do marpikir halak na mangastui.

²⁸Salang na oto i niambang pistar jana na marroha muda sai hohom-hohom ia jana manutup pamanganna.