Read Batak Angkola PODA 18 Bible Online

PODA 18 - Batak Angkola bible

PODA 18

¹Halak na so malo margaul, diparrohahon hum tu dirina, pandapot ni halak na asing nada tarjagitsa.

²Halak na oto nada ra nilehen pangastuion; giotnia hum na patuduhon hamaloon.

³Dosa dohot habilean rap udur do i mardalan; muda dung targora pasti muse ma niincahan.

⁴Hata ni jolma bolas gabe haroroan ni bisuk na bagas songon lautan jana borgo songon aek ni batang aek na mardalan sun tu dia.

⁵Nada denggan marpihak tu halak na so hasaya jana manahan hatigoran sian halak na so marsala.

⁶Muda mamungka halak na bodo martongkar, manigor martenju do pangidoanna.

⁷Hata ni halak na oto do manyegohon dirina; tardapot ia dibaen hata-hatana.

⁸Songon sipanganon na tabo do hobar na pajatjatkon, manigor bonduton do i.

⁹Sarupa do jahat ni halak na losok karejo, dohot halak na sai mambaen sego.

¹⁰Songon palas-palas na togu do TUHAN; tusi do maporus halak partigor anso malua.

¹¹Hape diambang halak na kayo sinadonganna i do mangondihon ia. Songon tembok na gincat boti togu humaliang kota.

¹²Muli madabu do halak na gakgak halak na toruk roha dapotan sangap.

¹³Jolo nitangihon painte so nialusan. Muda nada, oto do ho jana mambaen layas tu halak.

¹⁴Bisa do halak dapotan gogo na manaon parkancitanna, tapi muda so dapotan gogo, mago ma arop ni roha.

¹⁵Bahat do halak na pistar marjop ni roha, jana manguas marsiajar.

¹⁶Muda mangadop iba tu sahalak na sangap, obanon do silehen-lehen anso momo pasuo.

¹⁷Hata na parjolo di sidang pangadilan sai na martarimo do i, lopus mambaen sapa-sapa tusia alona i.

¹⁸Muda maradopan dua halak na gogo di pangadilan, tarpaberes do parkaro i marhite undian.

¹⁹Kahanggi na dijehehon, ummaol do i dijonoki sian kota na togu, jana partongkaran i ma songon palang ni pintu horbangan ni kota na marbenteng.

²⁰Butuha ni jolma dipabutong parbatu ni pamanganna, dipabutong do ia dohot parbatu ni bibirna.

²¹Mangolu sanga mate dirajai dila, barang ise na ra maningtingkonsa, angkon mangankon parbatuna.

²²Halak na dapotan boru, mandapot hauntungan; i ma na patuduhon bahaso tusia jop ni roha ni TUHAN.

²³Halak na pogos marsopan do mangido; mardongan songgak-songgak do alus ni halak na kayo.

²⁴Adong do dongan na so setia, adong muse do na rumosu sian kahangginiba.