Read Batak Angkola PODA 19 Bible Online

PODA 19 - Batak Angkola bible

PODA 19

¹Dumenggan do halak na pogos na denggan roha, ulang pado halak na oto na sai marbungkak.

²Nada denggan mangaringgas iba mangkarejohon na so binoto, halak na mopop gabe dapotan hamaolon do.

³Adong do halak na manyegohon dirina hara ni haotoonna, dung i TUHAN ma dipasala ia.

⁴Halak na kayo sai martamba do donganna; halak na pogos mur dohot do donganna manadingkonsa.

⁵Halak na margabus di pangadilan, nada malua sian uhuman.

⁶Bahat do halak mambuat roha ni na sangap, jana ganup do halak mardongan dohot na basa.

⁷Halak na pogos menek do di kahanggina, tarlobi-lobi dope di dongan-donganna. Sanga na bia pe dibaen ia, nada tarbuat ia rohana.

⁸Sanga ise na marayak parbinotoan, mangkaholongi dirina; sanga ise na marningot na niparsiajaranna, gabe maduma.

⁹Nada malua sian uhuman saksi pargabus, tapi halak na margabus diparsoada do.

¹⁰Nada patut mur kayo halak na oto, jana nada patut hatoban mamarenta parkuaso.

¹¹Halak na marroha ditahan do murukna. Tarpuji do ia hara ni na so parduli di hasalaan ni halak maradopkon ia.

¹²Songon parngaur ni singa do parmuruk ni raja; tapi songon nambur tu suan-suanan do haburjuonna.

¹³Anak na oto bolas jadi mangaroncohon amangna. Dadaboru na patubekbek tudos tu aek na manetek so adong mantakna.

¹⁴Bagas dohot sinadongan na bolas dapot do i sian ama ina, tapi dadaboru na marroha hum sian TUHAN do dapotna.

¹⁵Muda giot parlosok ho, rohamu ma di ho! Torus ma ho modom, lalu ma naron malean ho.

¹⁶Muda giot malua angkon nioloan do parenta ni Debata; muda nada argahononmu, mate noma ho, da!

¹⁷Mangurupi halak na pogos tudos do na pasalihon tu TUHAN; laing TUHAN muse ma na paulakkon.

¹⁸Ajari anakmu maraturan dompak poso dope; muda nada, na nihagiotanmu do ia mate.

¹⁹Padiar dirasoi sandiri akibat ni muruk ni halak parmuruk i. Muda niantoan i mur tu segona dope i.

²⁰Tangihon ma poda, jana parhagiot ma parsiajaran, anso marbisuk ho.

²¹Tarbaen jolma do patupa sangkap, tapi hum maksud ni TUHAN do na tarlaksana.

²²Tabiat na nipangido sian sada-sada halak, i ma hasetiaanna. Gumonanan do na pogos ulang pado pargabus.

²³Biar mida TUHAN parohon hangoluan, jadi marbongin ma jolma di bagasan jop ni roha, nada ditinggang parhancitan.

²⁴Adong do halak na santak losok; mangaum indahan pe rohana dokdok.

²⁵Muda niuhum halak na sombong, disi pe halak na so marpangalaman i dapot pangajaran. Muda niajar halak na marroha, gabe dapotan ia parbinotoan.

²⁶Anak na mamparhanciti jana paorot simatobangna, i ma anak hahaila jana targora.

²⁷O anakku, muda nada be ra ho marsiajar, lupa ma ho di na niparsiajaranmi.

²⁸Sada saksi pargabus palayasonna do hatigoran; dabuhonon ni hajahatanna do hatigoran.

²⁹Jolma na oto na ginjang roha pasti do i hona balbalan.