Read Batak Angkola PODA 26 Bible Online

PODA 26 - Batak Angkola bible

PODA 26

¹Nada patut halak na bodo dapot pujian; songon udan di logo ni ari dohot salju di ombas na milas.

²Songon unggas na habang di awang-awang jana hum na mamolus sajo, nada tarbaen hona bura halak muda na so marsala do.

³Songon kokang di halode dohot sambok-sambok tu kudo, songon i do di tano on halak na oto.

⁴Jolma na mangalusi halak na oto, sarupa do otonia dohot bayo i.

⁵Sapa-sapa na oto angkon nialusan muse dohot alus na oto, anso diboto na marsapa i bahaso na so malo ia songon na niambangnia i.

⁶Marsuru sada na oto laho manongos barita, tudos tu na mamonggol patna sandiri do i gabe hamamagona.

⁷Songon pamake ni jolma na pangpang di patna, songon i do halak na oto na mandok podana.

⁸Mamuji jolma na so marparbinotoan, songon na manambat batu do i di ambalangna.

⁹Songon halak na mabuk na mangumpat duri sian tanganna, songon i do halak na oto na pajojorkon poda.

¹⁰Sanga ise na marsuru halak na oto dohot pamolus na markarejo, mambaen hararugi do i di bahat halak.

¹¹Songon anjing na mulak tu uta-utana, songon i ma halak na oto mangulahi haotoonna.

¹²Dao dope dumenggan halak na oto ulang pado jolma na mangetong dirina malo.

¹³Halak na losok giotna nian tinggal di bagas hara ni alasan: Mabiar disoro babiat di tonga dalan.

¹⁴Songon pintu na mordong di encelna, songon i do silosok margiling-giling di podomanna.

¹⁵Adong do jolma na santak losok, salang mangaum indahanna pe ia losok.

¹⁶Umbisuk do na losok dietong rohana ulang pado pitu halak na mangalehen alus na satutuna.

¹⁷Jolma na mangantoi partongkaran na so urusanna tudos do i dohot halak na manangkup pinggol ni anjing gila.

¹⁸Jolma na manipu na margonjak do nian rohana tudos do i dohot halak na rintik na marmayamkon sinjata parmaraan.

²⁰Mintop do api muda abis soban; muda nada adong be siruak baba, mantak do partongkaran.

²¹Songon arang dohot soban mambaen api torus gara; songon i ma halak na sai tagi martongkar, mambaen panas na masa.

²²Tabo do dai ni hata na dipatubu-tubu; dihagioti halak na mamondut.

²³Songon hudon tano na disopu dohot perak, songon i ma halak parhata lancap tapi marroha na jat.

²⁴Tabo do hata ni parlate tapi anggo rohana gok sipaoto-oto do hape.

²⁵Haru pe rama ia, ulang iba porsaya; angke gutgut do manggohi rohana.

²⁶Haru pe dibunihon ia na sogo rohania, idaon ni halak do sude hajahatanna.

²⁷Sanga ise na manghuar lubang tu halak na asing, runcur do i tu bagasan. Sanga ise manggulang batu, i do na nidondonanna.

²⁸Sarupa do na manggabusi dohot na marsogo roha tu halak. Hata na tabo parohon mara.