Read Batak Angkola PODA 27 Bible Online

PODA 27 - Batak Angkola bible

PODA 27

¹Ulang hata-hatahon sanga aha na giot sibaenonmu ancogot, sanga aha na giot tarjadi sadari on ise lakna umboto.

²Ulang puji dirimu jana ulang patimbo dirimu, padiar ma halak na asing mamuji dirimu, bope halak na nitandamu.

³Nayang dope batu dohot horsik muda nipartimbangkon dohot hamaolon na tubu hara ni haotoon.

⁴Kejam do haririmas jana manyegohon, tapi ise ma na tahan mangadopi pangiburuon?

⁵Gumonan do torang digorahon ulang pado holong ni roha na so dipataridahon.

⁶Anggo dongan dohot holong do mamukul, tapi anggo musu dohot rasun do manghaol.

⁷Muda butong, aer ni loba pe nitulak; muda male, na paet pe gabe nipolgak.

⁸Halak na manadingkon bagasna, tudos tu unggas na maninggalkon asarna.

⁹Miak na huskus dohot na muap-uap pasonang roha; hadengganan ni dongan marmual sian roha.

¹⁰Ulang halupahon donganmu dohot dongan ni amangmu. Di hasusaan, ulang pangido bantuan ni kahanggimu; margunaan do hombar bagas na donok ulang pado dongan saama-saina na dao.

¹¹Ale anakku, sai marbisuk ho nian, anso sonang au jana tarbaen maralus muda digorahon.

¹²Manyipi do halak na marroha muda diidasa parmaraan; anggo na oto didalani do torus lalu marmara.

¹³Sanga ise na ra mananggung utang ni halak na so nitandana, patut do nibuat sinadonganna gabe jaminan ni janjina.

¹⁴Sanga ise di sogot ni ari na manabi donganna marsora na gogo, etongon do i na mandok hata bura dohot hamamago.

¹⁵Dadaboru na tagi martongkari tudos do i tu udan na manetek-netek hatiha ari udan.

¹⁶Nada tarsuru i anso hohom, songon alogo na so tarambat dohot miak na so targolom.

¹⁷Laing songon baja na manggarut baja, laing songon i muse do jolma marsiajar sian donganna.

¹⁸Sanga ise na marsuan-suanan panganonna do parbatuna. Dipasangap do pangoloi muda dioloi do tuanna.

¹⁹Na niidamu di bagasan aek, i ma halinu ni tompamu, na niidamu di bagasan rohamu, i ma dirimu.

²⁰Anggo di inganan ni halak na mate, lumbang do inganan; laing songon i ma hagiot ni jolma nada tarsuhat bidangna.

²¹Sere dohot perak diuji di bagasan api, tandaon do halak sian pangkobarina.

²²Haru nigogoan pe mambalbal halak na oto, nada gabe ruar habodoonna sian dirina.

²³Denggan ma pature-ture pahan-pahananmu,

²⁴dibaen nada hot sinadongan. Salang bangso pe nada martahan salolot-lolotna.

²⁵Disabi do ruput na di ladang dohot na di dolok jana dipalagut baen di pahan-pahanan. Manigor do tubu ruput na imbaru.

²⁶Dapot ho do sian biri-birimu pakean, jana hepeng ni hambeng na nigadismu deba tartobusi ho do tano na imbaru.

²⁷Sian angka hambengmu na asing i dapot ho do susu di ho dohot di pangisi ni bagasmu maradu di angka pangoloimu.