Read Batak Angkola PODA 28 Bible Online

PODA 28 - Batak Angkola bible

PODA 28

¹Marlojongi do halak parjahat haru so adong na mangayak, tapi halak na tigor barani do songon singa.

²Marpupu margonti do raja ni bangso pardosa; sai hot do marbungaran anggo bangso na marraja na marroha.

³Pangarajai na mamisat halak na pogos, songon udan potir na manyegohon parbatu ni suan-suanan.

⁴Sanga ise na pageduk uhum, mamihak tu na jahat; sanga ise na mangoloi uhum, mangalo halak na jahat.

⁵Nada diastui halak na so hasaya hatigoran, tangkas sajo do i diastui halak na manyomba TUHAN.

⁶Dumenggan do halak na pogos parroha na bulus umpado halak na kayo na sai tagi margabus.

⁷Doli-doli na mangoloi uhum, i ma halak na marroha. Tapi halak na mardongan dohot halak na mermur, amangna do na dipailasa.

⁸Sanga ise na gabe kayo hara ni na mangan bunga ni singir dohot na mambuat untung sabahat-bahatna, madabu ma sinadonganna tu tangan ni halak na maribo ni roha tu halak na so marnampuna.

⁹Muda nada oloanmu uhum, tangiangmu pe sihagigian do.

¹⁰Sanga ise na mangirangi halak na burju anso marjahat, ia sandiri pe madabu do tu jorat.

¹¹Sai matua na marbisuk do dirina hilalaon ni halak na kayo, tapi halak na pogos na marroha, sai tongtong do ditanda dirina.

¹²Muda markuaso halak na burju, sude halak sonang, muda mamarenta halak na jahat, nada ra be rayat campur tangan.

¹³Na manabunihon dosana, nada i maruntung. Sanga ise na mangokui jana manadingkon dosana, Debata do, mangalehen ampun.

¹⁴Tongtong ma pasangap TUHAN, gabe martua ma ho. Muda dialo ho Ia, dapot mara ma ho.

¹⁵Parjahat na markuaso tu halak na marhahurangan, songon singa na marngaur sanga songon gompul na manyoro do i.

¹⁶Kejam do pambaen ni parkuaso na so adong parbinotoanna, mamarenta do ia martaon-taon muda dihagigihon ia hageduhan.

¹⁷Halak na mamunu jolma, na mangkojar hamatean do i, ulang ma adong na manolong ia.

¹⁸Martua do di ngoluna halak na tigor madabu do ompot halak na so tigor.

¹⁹Partani na marpadot tuk do sipanganonna. Halak na mansua-saehon ari-ari gabe hurangan.

²⁰Halak na tigor, pasupasuon, tapi halak na mopop kayo, nada malua sian uhuman.

²¹Nada denggan muda nibaen siida-ida bohi, tapi adong juo do panguhum na mamihak hum hara ni hepeng na saotik.

²²Halak na lobo sai giot tibu mamora, nada mamoto ia na giot ro ma tompu hapogoson tusia.

²³Halak na manggorahon ujungna sumangap do sian na mangalehen pujian.

²⁴Na manangko sian simatobangna jana mangetong songon i nada dosa, sarupa do i tu angka panangko na somal.

²⁵Patubu partongkaran do na ahut tu diri, maruntungan do iba muda TUHAN dihaporsayai.

²⁶Sanga ise na mangasahon pandapotna sandiri, nada adong na binotona. Sanga ise na mangihutkon pangajaran ni halak na marroha maruli hangoluan.

²⁷Na mangalehen tu na pogos nada i marhahurangan. Sanga ise na papitpit matana tu haporluan ni na pogos, hona bura baenon ni halak.

²⁸Muda markuaso halak na jahat, rayat manabunihon diri; muda pusa halak na jahat, mur tamba ma bahat ni halak partigor.