Read Batak Angkola PODA 30 Bible Online

PODA 30 - Batak Angkola bible

PODA 30

¹Angka on ma hata na nipajojor ni si Agur anak ni si Jake na sian Masa: Ning ia ma: “Loja nai au, ale Debata, loja nai au, madung abis gogongku!”

²“Umoto do au sian halak na asing; nada adong di au pangastuion.

³Nada jungada huparsiajari habisuhon, saotik pe taringot tu Na Sun Badia nada huboto.

⁴Jolma dia ma he na umboto pangalaho ni banua ginjang? Unjung ma he dipohul ia di tanganna alogo, jana disaputi ia aek di bagasan bajuna, sanga manontuhon batas ni alam on sudena? Ise he ia jana ise anaknia? Pasti diboto ho do i?

⁵Digohi Debata do sude janjiNia. Songon parince do Ia di sude na ro marsiholip tuSia.

⁶Muda ditambai ho na nidokNia, gabe hona gora ho baenonNia jana buktihononNia bahaso na margabus ho.”

⁷“Ale Debata, pangidoanku lehen ma na dua pangalaho on di au painte so mate au.

⁸Ulang jabat hupardokkoni angka hata gabus, jana ulang padiar au marpogos sanga makayo. Hum na huhaporluhon pe lehen di au.

⁹Harana, muda ompot kayo au, betak na gabe dokkononku do, na so porlu Ho di au. Jana muda marpogos au, betak na manangko ma au, jadi gabe hodar goarMu.”

¹⁰Ulang patubu-tubu hata pajatjatkon hatoban tu tuanna, anso ulang hona bura ho jana marsitaonon ho hara ni i.

¹¹Adong do halak na pasumpahon amangna jana na so mangargahon inangna.

¹²Adong do halak na mangetong ias dirina hape nian na santak do hodarna.

¹³Adong do halak si ginjang roha, sai gakgak ma pangaligina.

¹⁴Adong do halak na kejam na mambuat pangomoan sian na pogos dohot na dangol, sai songon i do dikarejohon manjalahi ngoluna.

¹⁵Ia si linta adong do dua borunia, dua-duana boruna i margoar: “Diau” dohot “Diau”. Adong do opat na so ra sidung pangidoanna, i ma:

¹⁶Portibi ni halak na mate, dadaboru na so unjung mardakdanak, tano na hiang na mangido udan, dohot api na mandilat humaliang.

¹⁷Halak na mangincahi amangna sanga inangna na dung matobang, patutna do disampakkon tu ruar anso diturbing sigawak matana i jana dipangan rajawali bangkena i.

¹⁸Adong do opat parkaro na mamaoltu di au astuan:

¹⁹Unggas rajawali na habang di ginjang, ulok na manjirir di ginjang ni batu korang, kapal na marlayar di tonga ni lautan, dohot sarongkap na poso bulung na marsisoloman mata.

²⁰On do siasat ni sada dadaboru na so setia tu halaklahi; dung marmainan, mangan ma ia lalu diceka ia pamangannia, dung i didok ia ma, “Nada hubaen da sanga na aha!”

²¹Adong opat pangalaho na maol jagiton ni na satano on:

²²Sada hatoban na gabe raja, sada na oto na tarbaen mandapot sude por ni rohana

²³sada anakboru na gabe marbagas hape nian nada dihalomohon halak ia, sada hatoban dadaboru na mangarampas pangkat ni nyonyana.

²⁴Adong do di tano on opat ragam binatang na menek tapi sun malona, i ma:

²⁵Porkis, binatang na so margogo, tapi na paradehon panganonna di musim logo.

²⁶Landuk, binatang na gale, tapi di dolok batu do dibaen ia asarna.

²⁷Siapor, binatang na so marraja, hape taratur do marbaris.

²⁸Ancocak, binatang na tartangkup dohot tangan, tapi dapot do i idaon di bagas godang ni raja.

²⁹Adong do opat na pahomang roha muda niparrohahon sian pardalanna, i ma:

³⁰Singa, binatang na gumogo sian antara ni sude binatang jana na so mabiar maradopkon sanga aha;

³¹hambeng randuk, manuk jambe dohot raja di jolo ni rayatna.

³²Muda na bodo ho gabe ditahi ho na jat, ulang palalu, tapi torang pikiri.

³³Muda dipahimpal ho susu gabe dadi ma i. Muda diantuk igung jadi marmudar ma i. Muda dipatubu muruk tubu ma parbadaan.