Read Batak Angkola PODA 5 Bible Online

PODA 5 - Batak Angkola bible

PODA 5

¹Ale anakku parrohahon jana tangihon ma habisuhonku dohot pangastuionku,

²anso diboto ho marparange na ture jana tarida ma sian hatamu na adong parbinotoanmu.

³Angke songon tonggi ni aer ni loba do bibir ni dadaboru jalang jana umma-ummana lumandit sian miak zetun.

⁴Tapi dung salpu i gabe paet ma songon pogu, jana tajom songon podang.

⁵Manuat ma ho saratonnia tu inganan ni halak na mate; na giot tu hamatean do dalan na nibolusna.

⁶Nada dipikiri ia dalan hangoluan, madung manyirpang ia, jana nada diboto sanga aha sidalananna.

⁷Hara ni i, ale anakku, tangihon ma au jana ulang ma halupahon angka hatangku.

⁸Mandao ma ho sian dadaboru na songon i! Salang mandonohi bagasna i pe, indangkon.

⁹Muda margaul ho dohot anakboru i, agoan ma ho di hasangapanmu jana hosamu pe rampason ma di hatiha haposoonmu, rampason ni halak na so tumanda ibo ni roha.

¹⁰Anso ulang dibuat halak sinadonganmu, jana anso ulang gabe halak na asing nampuna suha ni halolojamu.

¹¹Dung i mangarar ma ho hancitan painte-inte ajalmu jana abis ma pamatangmi panganon ni nyae.

¹²Jadi dohononmu ma, “Iale, biasi ma nada ra au manjagit sipaingot? Biasi nada ra au diajar?

¹³Nada ra au manangihon angka gurungku jana nada huihutkon halahi.

¹⁴Hape dung saonnari maila ma au di tonga-tonga ni halak na bahat.”

¹⁵Antong hara ni i, setia ma ho tu dadaborumu sandiri, jana tusia sajo ma lehen holong ni rohamu.

¹⁶Denggan ma he mata aermu marlobian tu duru, songon batang aek di alaman?

¹⁷Sasada ho ma nampuna halahi, nada tola dohot halak na asing.

¹⁸Hara ni i mar jop ni roha ma ho tu dadaborumu tagan di haposoonmu,

¹⁹na jogi songon ursa jana lingkas songon hije, adopna tongtong pajop rohamu dohot hara ni holong ni rohana.

²⁰Ale anakku, biasi ma dilehen ho holong ni rohamu tu dadaboru na asing, biasi ma pola jopan rohamu di hajegeson ni dadaboru na asing?

²¹Diida TUHAN do sasude na nibaenmu, dijago Ia do ho sanga na tu dia pe ho kehe.

²²Songon tirangkap do dosa ni jolma na jahat na manjorat halakna i sandiri.

²³Mate ma ia hara ni na so manjagit pangajaran. Obanon ni haotoonna i ma ia tu tanoman.