Read Batak Angkola PODA 6 Bible Online

PODA 6 - Batak Angkola bible

PODA 6

¹Ale anakku, betak na jungada ho marjanji sanga na tu ise laho mananggung utangna.

²Jana betak na dung tarjorat ho hara ni angka hatamu jana tardapot hara ni janjimu sandiri.

³Muda tutu do songon i, ale anakku, anggo ho madung di bagasan kuaso ni bayo i. Tapi songon on ma dalanna anso tarbaen ho luncat sian i: Ompoti ma mandapotkon ia, jana gomos ma pangidohon anso ra ia paluahon ho.

⁴Ulang jolo modom ho sanga na maradian.

⁵Palua ma ho sian tirangkap i songon unggas sanga hije na paluahon dirina sian na marburu.

⁶Ale ho na losok, kehe ma ho marsiajar tu porkis; parrohahon ma pambaenanna i.

⁷Hape nada adong pamimpin ni porkis, mandurna sanga rajana,

⁸tapi dipalagut halahi do sipanganonna salolot sabion bohalna tu haleon.

⁹Sadia lolot nari ho ale na losok sai modom, andigan pe ho ngot?

¹⁰Angke nimmu do: “Santongkin nari jolo hupapodom, jana santongkin nari hupapayak-payak.”

¹¹Hape di hatiha na modom i ho, ro ma ompot mandondoni ho hapogoson na ro songon panangko na marsinjata.

¹²Kehe do mangadangi halak na jahat mangkecetkon gabus.

¹³Dohot do matana, patna dohot tangannia dipake laho paoto-otohon.

¹⁴Angke na jahat sajo do dipikiri di bagasan rohania, na jat i anso mambaen parbadaan.

¹⁵Hara ni parbuatanna i, ompot ma dondonan ni parmaraan halahi gabe mate ma halahi.

¹⁶Adong do pitu parkaro goyak ni roha ni TUHAN jana na so tarpadiar Ia: Tabiat na sombong. Pamangan pargabus. Tangan na mamunu halak na so marsala. Utok-utok na mambaen sangkap na jahat. Pat na mopop kehe tu hajahatan. Saksi na sai torus margabus, dohot halak na patubu-tubu parbadaan di tonga-tonga ni dongan.

²⁰Ale anakku, patulus ma sanga aha na niparentahon ni amangmu, jana ulang halupahon angka sipaingot ni inangmu.

²¹Simpan ma i di bagasan rohamu, jana parborgok ma i.

²²Muda mardalani ho dongannia do ho; muda modom ho, jagoannia do ho, jana muda ngot ho pangkulingannia do ho.

²³Angke songon palito do poda i; jana dalan hangoluan sipaingotna.

²⁴Angke jagohononnia do ho sian dadaboru jalang dohot sian hata ela-ela ni dadaboru na asing.

²⁵Ulang dihagioti rohamu hajegeson ni halahi, jana ulang tartarik rohamu baenon ni pangkidop ni matana.

²⁶Hepeng do na arga di dadaboru jalang tapi ngoluniba na arga i giot buaton ni dadaboru ni halak na asing.

²⁷Bisa dehe dioban halak api di andorana na so mosok bajuna?

²⁸Tardege halak ma he api na so mosok patna?

²⁹Sarupo do bahaya ni i dohot na modom rap dohot dadaboru ni halak na asing. Sanga ise na mambaen songon i, nada malua sian uhuman.

³⁰Nada pola dipaila halak na manangko hara ni malena.

³¹Tapi haru songon i pe, anggo tardapot do ia, angkon dangdangannia do mangulahi pitu noli lompit, jadi angkon pasahatonnia noma sasude na adong disia.

³²Tapi halak na markarosuan, na hurang roha do ia disi angke na manyegoi dirina sandiri do ia disi.

³³Marjaya jana digorai ma ia jana maila ma ia salolotna.

³⁴Angke ra do gabe mangiburu halaklahi ni anakboru i baenon ni parbuatan i. Muda mangiburu sada halaklahi, gurgur ma murukna jana nada haotapan be hosomna.

³⁵Nada tarelek i dohot hepeng; sanga sadia bahat pe silua nada bolas paombun murukna.