Read Batak Angkola PODA 7 Bible Online

PODA 7 - Batak Angkola bible

PODA 7

¹Ale anakku, ingot ma na hudok tu ho, jana ulang halupahon na hudok karejohononmu.

²Ihutkon ma angka sipaingotku anso mangolu ho. Denggan ma ihutkon angka pangajaranku songon panjagomu di anak ni matamu sandiri.

³Sai paingot-ingot ma tongtong angka pangajaranki, jana simpan ma i di bagasan rohamu.

⁴Etong ma di rohamu habisuhon i kahanggimu dohot parbinotoan i donganmu na solkot.

⁵Padaoon ni habisuhon i ma ho sian dadaboru ni halak na asing na sai manggogo manangkup rohamu dohot hata na tonggi.

⁶Di na sanoli manaili ma au sian jandela ni bagasku.

⁷Jadi huligi ma bahat doli-doli na bajar dope; tapi hupamanat ma tangkas sada na oto sian tonga-tonga ni halahi.

⁸Mardalan ma doli-doli na oto i di dalan i, lalu ma ia donok tu bagas ni sada dadaboru jalang.

⁹Tongon ma i hatiha andospotang.

¹⁰Lalu kehe ma dadaboru panggampang i mandapotkon ia, dipake ma abit na songon abit ni dadaboru jalang jana madung adong tahina na jat.

¹¹Puluk do dadaboru i jana nada ra maila. Angke sai kehe do ia pahae-pahulu, jana nada sonang di bagasna.

¹²Maradian do halahi di topi ni dalan sanga na inganan na ribur.

¹³Dung i dihaol ia ma doli-doli i lalu diummai ia. Nada jabat adong be ila ni rohania, didok ia ma,

¹⁴“Madung pasahat haul au sadari on, laing di bagas dope juhut ni haul i.

¹⁵I do umbaen na ruar au manjalahi ho, hapengani ma di jolongku ho!

¹⁶Ma pola hututupi podomanku dohot abit linen na marbunga-bunga na sian Mesir,

¹⁷jana hupispis dohot miak wangi na sian mur, cendana dohot hulim.

¹⁸Keta ma saonnari marsihaol-haolan hita lalu tarasoi ma na marcinta saborngin on.

¹⁹Nada di bagas halaklahingku, topet do mardalanan ia tu na dao.

²⁰Maroban hepeng do ia bahat, jana nada mulak ia anggo di bagasan dua minggu on.”

²¹Songon i ma dibaen anak boru i mangarayu doli-doli i mardongan elek-elek na manarik lopus gabe targoda ia.

²²Nada marpikir be ia manigor mangihut tu anak boru i songon lombu na diiring tu panyambolan jana songon ursa na giot kehe tu jaring.

²³Santongkin nari tombuhon ni anak ni pana ma andorania. Songon unggas na habang manyuruk jaring, nada diboto madung marmara ngoluna.

²⁴Hara ni i, ale dakdanak, tangihon ma au. Parrohahon ma angka sipaingotku.

²⁵Ulang padiar dadaboru na songon i manangkup rohamu; ulang ho kehe manjalahisa,

²⁶harana na dung bahat do disegohon ia ngolu ni halaklahi. Nada taretong bahatna na mate hara ni ia.

²⁷Muda kehe ho tu bagasna i, na mardalan tu hamatean na mamondut do i.