Read Batak Angkola PODA 9 Bible Online

PODA 9 - Batak Angkola bible

PODA 9

¹Dipajongjong habisuhon do bagas, jana dibaen ia do pitu tiangna.

²Disambol ia do pahan-pahanan sibaenon di pesta, dipulung ia anggur jana diparade ia sipanganon.

³Disuruhon ia ma angka dadaboru parkobas marontang undangan. Pio-pio ma angka pangoloi i sian angka inganan na gincat di kota mandok,

⁴“Sanga ise na so marpangalaman, ro ma tuson!” Tu halak na oto, didok habisuhon do,

⁵“Ro ma mandai panganonku dohot mangarasoi anggur na dung huramu.

⁶Tadingkon ma halak na oto, anso mangolu hamu; jana ihutkon ma dalan ni halak na marroha.”

⁷Muda dipatuduhon ho sala ni halak siginjang roha, incahannia do ho. Muda dimuruhi ho halak na jahat, hona siksa do ho baenonna.

⁸Ulang paingot halak pangincahi, gabe goyak do rohania mida ho. Tapi anggo halak na marroha, muda dipatuduhon ho hasalaanna, gabe argaannia do ho.

⁹Muda dipaingot ho halak na marroha, mur marbisuk muse ma ia. Jana muda halak na burju mangoloi Debata diajari ho, mur martamba ma parbinotoannia.

¹⁰Anso gabe marbisuk, angkon parjolo do halak marsangap jana mabiar maradopkon TUHAN. Muda ditanda ho do Na Sun Badia i, gabe dapotan pangartian ma ho.

¹¹Lehenon ni habisuhon do di ho umur na ginjang.

¹²Muda adong di ho habisuhon, ho sandiri do na maruntung. Tapi muda ho do na manulak habisuhon, ho muse do na marugi.

¹³Songon dadaboru na bekbek na so marpangalaman boti na so umboto hahaila do anggo haotoon.

¹⁴Juguk ma ia di pintu ni bagasna, sanga di harbangan ni kota.

¹⁵Sian i ma ia pio-pio tu angka halak na mamolus. Dielek-elek ia ma angka halak na bulus marroha,

¹⁶“Maradian ma jolo, hamu na so marpangalaman!” Jana tu halak na oto didok ia,

¹⁷“Umborgo do aek na nitangko, tumabo do roti na nijemut.”

¹⁸Barang ise na kehe tusi nada diboto ia na disi do hamatean, jana na masuk tu bagasna, madung masuk tu bagasan hamatean.