Read Batak Angkola PARJAMITA 1 Bible Online

PARJAMITA 1 - Batak Angkola bible

PARJAMITA 1

¹On ma angka hata ni Parhapistaran, i ma anak ni si Daud, raja di Jerusalem.

²Didok Parhapistaran i do: Magopo do sasudena jana nada marguna! Parcuma do ngolu i, nada adong artina sudena.

³Markarejo hita salolot mangolu, maradu hodohan. Hape dia ma suhana na tarhagodangkon hita?

⁴Tarida sundut na sada jana mago ma sundut na asing, hape nada marnamuba tano on.

⁵Laing bincar do mataniari jana laing lusut muse. Jana mulak tu ingananna humani, dung i bincar mangulahi.

⁶Mangombus ma alogo tu Selatan, dung i mangombus tu Utara; marputar-putar ia, dung i mulak mangulahi.

⁷Mardalan tu laut do sude batang aek, hape laing so marnagok do laut i. Mulak aekna i tu julu ni batang aek i, dung i mardalan pahae mangulahi.

⁸Sude do paloja roha jana nada tarhatahon loja ni roha i. Nada marnabutong matanta i manatap; pinggolta i nada marnapuas manangihon.

⁹Sanga aha na jungada tarjadi, tarjadi muse do mangulahi. Sanga aha na nibaen, giot baenon muse dope. Nada adong sanga aha na imbaru di tano on.

¹⁰Adong halak na mandok, ‘Ligi ma, indon na imbaru!’ Hape, na dung adong hian do i dompak so sorang hita.

¹¹Nada diingot jolma na masa di hatiha na salpu. Laing songon i muse ma na masa saonnari dohot sanoli on, indangkon na ingoton ni halak i di hatiha na giot ro.

¹²Au Parhapistaran, mamarenta di Jerusalem gabe raja di Israel.

¹³Hupasada do rohangku laho manangkasi dohot marsiajari sude na masa di tano on. Sun do dangolna jambar na dilehen ni Debata tu hita.

¹⁴Madung huida sude na masa di tano on. Pos ma rohamu, magopo do sudena i, tarsongon karejo na manangkup angin.

¹⁵Na peol nada tarpatigor, jana na so adong nada taretong.

¹⁶Ninna rohangku, “Na pistar do au, dao umpistar sian sude halak na mamarenta di Jerusalem dompak so au. Torang situtu do huastui arti ni habisuhon dohot parbinotoan.”

¹⁷Jadi hupasada do rohangku laho mamboto parkotian ni parbinotoan dohot haotoan, antara ni habisuhon dohot na pamalo-malohon. Hape songon na manangkup angin sajo do au.

¹⁸Harana, mur bahat maruli habisuhon, mur martamba do arsak ni roha. Jana na manambai parbinotoan, mur manambai angka hasusaan do.