Read Batak Angkola PARJAMITA 11 Bible Online

PARJAMITA 11 - Batak Angkola bible

PARJAMITA 11

¹Danggurkon ma rotimu tu aek, jadi dung lolot dapot ho ma i muse.

²Lehenma bagian i tu pitu sanga tu salapan halak, angke porlu do jamot-jamot halak, painte so masa hasusaan.

³Sanga na sundung tu dia pe hayu marumpak, totop do i di inganan hadabuanna i payak. Muda marisi aek do ombun i jabat sorat, udan pe madabu ma tu tano maradu por.

⁴Sanga na ise na paintehon lopus denggan sun alogo dohot ari, nada saut i manyuan jana nada muse i mambuat suha.

⁵Dibaen Debata do sasudena, jana nada tarbaen jolma mangastuisa. Partumbur ni ngolu na imbaru nada diboto jolma di bagasan bortian ni sada ina.

⁶Angkon manyuan ma ho dompak manyogot ari baen muse ma songon i di borngin ni ari. Angke nada taboto sanga na dia na denggan partubuna. Ra muse do gabe dua-duana rap denggan partubuna.

⁷Sinondang ni mataniari pajop roha; tabona i hape muda tarpargunahon iba.

⁸Dokkon ma tarimakasi muda martamba umurmu. Tapi ingot ma, haru lolot pe ho mangolu di tano on, lumolot dope ari-arimu di bagasan hamatean. Jadi, aha dope lakna siaropon ni rohanta? Parcuma do sudena i jana magopo.

⁹Hamu angka na poso, marjop ni roha ma hamu di haposoonmu. Marsonang-sonang ma hamu dompak poso. Baen ma giotmu, jana patulus ma giot ni rohamu. Tapi ingot ma, angkon uhumon ni Debata do muse sude na nibaenmu.

¹⁰Paorot ma ganggu dohot susa sian rohamu, angke tibu do salpu haposoonmu.