Read Batak Angkola PARJAMITA 12 Bible Online

PARJAMITA 12 - Batak Angkola bible

PARJAMITA 12

¹Ingot ma Na Manompa ho taran di haposoonmu, painte so dapot angka taon na gok hasusaan. Anggo di hatiha i dokkononmu ma, “Nada martua ngolungku.”

²Muda dapot ma hatiha i nada torang be matamu, gabe rambon ma sinondang ni mataniari, bulan dohot bintang. Ombun na robot na maroban udan, totop ma i paihut-ihut ho songon ancaman.

³Humitir ma tanganmi jana nada be mangalehen pangondian. Patmu na tohong i telduk-telduk ma i so marhagogoan. Iponmu pe ma murak laho mangilkil sipanganon. Matamu homur gabe parambon parnidaan.

⁴Alang-alang tarbege noma tu pinggolmu hariburon na di dalan i. Sora ni musik dohot panggilingan giot-giot so habegean. Nada sinok be parmodommu. Sora ni unggas pe, ma tarsunggul ho dibaensa.

⁵Mabiar ma ho tu inganan na gincat jana mardalan ho angkon jamot-jamot. Obukmu pe maruba jana saratonmu patmu muda mardalan. Gabe mago ma sude hagiot dohot por ni roha. Na parayak tu ingananta na parpudi noma hita, marsiluluton ma angka jolma jana mangandungi sapanjang dalan.

⁶Martaldusan ma rante perak; madabu ma lampu sere jana matapor; magotap ma tali ni timba jana masego; matapor ma gunci jana masarsar.

⁷Mulak ma pamatangta, gabe abuan di tano. Mulak hosa hangoluanta tu Debata. Na nilehenNia do songon basa-basa.

⁸Ningku, tutu do, magopo do i sudena, parcuma sudena nada adong artina.

⁹Na pistar jana na marbisuk do Parhapistaran i. Hara ni i diajarkon ia tu jolma sude parbinotoan i. Bahat do poda diparsiajari ia, lalu diuji ia hatutuanna.

¹⁰Dihalojahon ia do padapot angka hata pangapoi, jana jujur do angka hata na nisuratnia.

¹¹Songon tungkot na pincur ni parmahan do hata ni halak na pistar, tungkot na nipakena mangaramoti biri-birina. Parpunguan ni poda dohot sipaingot, songon paku na pago hot. Laing basa-basa ni Debata do i sude, na marmahan hita sada-sada.

¹²Anakku, tu sada pangalaho angkon jamot do ho. Nada adong ujung ni panyuratan ni buku, jana mabahattu marsiajar mambaen loja do roha dohot pamatangniba.

¹³Dung hutimbang sasudena, on ma na dapot au panyimpulina. Habiari ma Debata jana oloi ma sude parentaNa, angke hum na giot tusi do jolma i ditompa.

¹⁴Uhumon ni Debata do sude parbuatanta; na denggan dohot na jat, salang na buni pe tehe.