Read Batak Angkola PARJAMITA 2 Bible Online

PARJAMITA 2 - Batak Angkola bible

PARJAMITA 2

¹Huputuskon ma di bagasan roha, giot pasonangkon rohangku sandiri jana mangkilalahon sanga songon dia hasonangan i. Hape laing tong do nada marguna.

²Taringot tu na martata, au mandok, “Haotoon do i,” jana taringot tu jop ni roha, “Aha ma guna ni i?”

³Hara ni pangonjar ni por ni rohangku anso gabe pistar, hupasada ma rohangku laho marsonang-sonang marhite na minum anggur dohot na marpesta-pesta. Ninna rohangku songon i ma dalanna na dumenggan di jolma laho mangkilala ngoluna na pendek i di tano on.

⁴Angke parkarejoan na godang pe madung hukarejohon. Hupajongjong angka bagas di au. Hubaen angka porlak dohot angka kobun na husuani dohot anggur dohot sude ragam ni bona ni suan-suanan.

⁶Huhuar angka tobat laho mangaehi angka porlak dohot kobun i.

⁷Bahat do parkarejongku, na hutobusi bope na sorang di bagasku. Dao do umbahat pahan-pahananku sian pahan-pahanan ni sanga ise pe na jungada maringanan di Jerusalem.

⁸Hupalagut do perak dohot sere na dapot au sian angka raja dohot angka luat. Dipasonang angka parende halaklahi dohot dadaboru do rohangku marhite angka ende ni halahi. Adong muse do di au angka boru sipakeonku sanga sadia bahat por ni rohangku.

⁹Tutu do, gumodang do au ulang pado sanga ise na jungada maringanan di Jerusalem, jana habisuhonku tongtong tinggal rap dohot au.

¹⁰Sanga aha por ni rohangku, dapot au do i. Na so jungada huorom diringku laho mangkilalahon hasonangan dia pe. Dihagodangkon rohangku do sude na dapot sian na huhalojahon, jana i ma upangku.

¹¹Tapi di pudi hupamanat ma sude karejongki, gabe huboto ma na so adong do arti ni i sudena. Magopo do sude karejongki songon na manangkup angin sajo.

¹²Sanga na bia pe anggo na tarpatupa sada raja, hum na nibaen ni angka raja na di jolona do i. Dung i mamungka hupikirkon sanga na bia do pangalahona muda marbisuk sada-sada halak, sanga loak sanga pe oto.

¹³Nian, huboto do, ‘Dumenggan do habisuhon sian haotoon, songon na torang dumenggan sian na golap.

¹⁴Diida halak na pistar do dalan na nitujuna; halak na oto songon na mardalan di na golap.’ Tapi laing huboto muse do na sarupa do jambar na mandondoni halahi sudena.

¹⁵Ninna rohangku di bagasan, “Laing bolusonku muse do jambar na ro tu halak na oto. Antong, aha do guna ni sude habisuhonki? Jadi gabe hubaen ma hapateanna paboa na so adong do sanga na aha guna ni i sudena.”

¹⁶Halak na oto manigor dihalupahon, tapi halak na maruli habisuhon pe, nada ingoton. Lolot-lolot muli mago do hita sudena sian parningotan. Angkon mate do hita sudena, halak na pistar bope halak na oto.

¹⁷Hara ni i, nada adong arti ni ngolu on di au, harana hum na parohon hasusaan do di au sude na masa di tano on, nada adong asing sian i. Sude do magopo; hum songon na manangkup angin sajo do.

¹⁸Sude suha ni parkarejoanku dohot pandapotku so adong gunana di au, harana angkon tadingkononku do i di na manggontihon au.

¹⁹Jana ise ma na umbotosa sanga na pistar ia sanga oto? Haru pe songon i laing ia ma na gabe panean di suha ni karejongku na dapot au salolot ngolungku di tano on parbatu ni halolojangku dohot habisuhonku. Jadi, i pe laing magopo do.

²⁰Saonnari gabe manyosal au na karejo i songon i lojana.

²¹Harana marsitutu do jolma karejo mamake sude habisuhon, parbinotoan dohot sinaloanna laho parayak sanga na aha. Hape di ujungna angkon tadingkononnia do sude suha ni halolojana i tu halak na so jungada hodohan saotik pe salaho tusi. Jadi, i pe laing magopo do, jana gabe hasusaan godang!

²²Marsitutu do markarejo jolma i salolot mangolu jana marsusa-susa; jadi dia ma suha ni halolojana i na tarhagodangkonsa?

²³Sanga aha na nikarejohonnia salolot di ngolunia, parohon pardangolan do i dohot hancit ni roha disia. Dompak borngin pe susa do rohana. Jadi na magopo do sudena i.

²⁴Nada adong be na dumenggan di jolma sian na mangan, minum dohot na mangkilalahon parkarejoan dohot suha ni karejona. Hupangkilalahon do sudena i, silehen-lehen ni Debata do.

²⁵Ise ma he na tarbaen mangan dohot marsonang-sonang so dohot Debata?

²⁶Debata do na mangalehen habisuhon, parbinotoan dohot hamogaan tu jolma na pasonangkon rohaNia. Tapi anggo halak pardosa disuru Ia do karejo manjalahi bohal dohot palagutkon suhana di halak na pasonangkon roha ni Debata. Jadi, sudena i magopo do songon karejo na manangkup angin.