Read Batak Angkola PARJAMITA 6 Bible Online

PARJAMITA 6 - Batak Angkola bible

PARJAMITA 6

¹Huida dope hageduhan na torus mandondoni di tano on.

²Huhul dilehen Debata hamoraon, hasangapan dohot sinadongan tu sada-sada halak, jabat nada adong be por ni rohania. Hape nada dipaloas Debata ia mandai sude na nilehenNa i. Sabalikna do, halak na asing do na mangarasoi dai ni hamoraan i. Jadi magopo do sudena i jana nada tigor.

³Haru pe adong sada halak saratus anakna jana lolot ia mangolu jabat matobang situtu ia, tapi muda nada martua pangkilalaannia jana nada dikuburkon ia di pangalaho na sapatutna, jadi anggo mangihutkon pandapotku, dumengganan dope jambar ni dakdanak na sorang na torus mate umpado bayo i.

⁴Harana anggo di dakdanak i nada gabe soal sanga ditubuhon ia sanga nada; kehe ia tu bagasan hagolapan, jana torus dihalupahon.

⁵Na so jungada dope diida ia sinondang ni mataniari, jana nada mangarti muse dope ia astuan ni ngolu on, jadi gabe sonang ia modom.

⁶Jana dumengganan do i umpado halak na mangolu dua ribu taon, hape nada jungada marhamogaan. Nada he rap kehe tu inganan na sarupa do na dua i?

⁷Karejo ni jolma i anso hum mangan do, hape nada jungada butong pangkilaannia.

⁸Antong, aha ma hauntungan ni halak na pistar sian sada halak na oto? Aha muse ma gunana diboto halak na pogos carana laho mangadopi ngolu on?

⁹Magopo do sudena i songon karejo na manangkup alogo. Gumonan do hita puas marhite na adong di hita ulang pado marpor ni roha anso umbahat dope.

¹⁰Sasudena na adong, na dung adong do i sian najolo. Taboto do, na so tarjua jolma halak na gumogo sian ia.

¹¹Mur honok ia manjua, mur so mararti do hata na nidokna, mur so adong do sanga aha untungnia.

¹²Bia do pamboto ni jolma sanga aha na dumenggan disia di bagasan ngoluna na pendek jana na so marguna, jana na salpu songon halinu? Bia do baenon ni jolma mangastui sanga aha na giot masa di tano on dung so adong be ia?