Read Batak Angkola PARJAMITA 7 Bible Online

PARJAMITA 7 - Batak Angkola bible

PARJAMITA 7

¹Gumonan do goar na huskus umpado miak sigodang arga; jana dumenggan do ari hamamate sian ari hatutubu.

²Gumonan do kehe tu na marsitaonon umpado tu parpestaan. Harana angkon sai ingotonta na intean do hamatean i tu ganop jolma.

³Gumonan do hamarsahan umpado na martata. Padiar ma murhing bohi, asal ma bahat pangastuion.

⁴Sai torus do halak na oto mangkojar hasonangan. Halak na pistar sai mamikirkon hamatean.

⁵Gumonan do digorahon halak na marsinaloan umpado mambege ende ni halak na oto.

⁶Partata ni halak na oto nada mararti, songon sora ni duri na nipangan ni api, magopo do i sude.

⁷Muda manipu halak na pistar, oto do pambaenannia i. Muda manjagit hepeng sogok halak, sego ma pikiranna.

⁸Dumenggan do ujung ni sada pangalaho umpado parmulaanna. Gumonan do hasobaron umpado ginjang ni roha.

⁹Ulang mura biraraon; hum halak na oto do na patiop-tiop hosom.

¹⁰Ulang nisapaan, ‘Biasi dumenggan hatiha najolo umpado saonnari?’ Hum halak na oto do na marsapa songon i.

¹¹Angkon marbisuk do jolma na mangolu; jana sarupa do arga ni bisuk dohot tean-teanan;

¹²dos muse do i dohot hepeng na parohon sonang ni pangkilalaan. Sanga ise na maruli parbinotoan dohot bisuk, marhaluaan ma ia.

¹³Parrohahon ma parkarejoan ni Debata. Harana ise ma he na tarbaen patigorkon sanga aha na nipageldok ni Debata?

¹⁴Antong, moga ma ho muda hatiha mardohar ho. Tapi muda hona hasusaan ho, ulang lupa ho na nilehen ni Debata do i dua-duana. Nada taboto sanga aha na giot masa udutna muse.

¹⁵Nada adong guna ni ngolungki, tapi salolot mangolu au huida do sasudena. Huhul mate do halak na burju i, haru pe tigor ia. Hape halak na jahat i ginjang do umurna, haru pe dipupu ia mardosa.

¹⁶Ulang maburjutu jana ulang mabisuktu. Aha guna ni na manyingkot?

¹⁷Ulang iba muse majahattu sanga maototu. Aha ma gunana mate painte so dapot hatihana?

¹⁸Pasiding ma parkotian godang ni na dua i. Muda nihabiaran Debata, angkon malua do hita.

¹⁹Margunaan do habisuhon di nampunasa, umpado sampulu na markuaso di sada kota.

²⁰Di tano on nada adong halak na sanggam, na sai tongtong mambaen na denggan na so jungada mardosa.

²¹Ulang sai ra manangihon angka pangkataion, nada binoto betak na adong sada naposomu na mamurai ho.

²²Ho sandiri pe diboto ho do jungada do diburai ho halak na asing.

²³Huuji do sudena i dohot habisuhonku. Hape mur hujalahi bisuk i, mur dao do i sian au.

²⁴Ise ma na dapotan arti ni ngolu on? Mabagastu do i laho artihonon!

²⁵Haru songon i pe torus do au marsiajar dohot manjalahi parbinotoan, anso dapotan bisuk dohot alus di sude parsapaan. Boti anso mangarti iba bahaso haotoan do dosa jana hajungkaton do hajahatan.

²⁶Dapot au bahaso umpaet do dadaboru sian hamatean. Songon jala dohot tirangkap na cokang manangkup sitangkuponna do holong ni roha ni dadaboru. Panghaolna songon rante pambobok na togu. Malua do joratna i sanga ise na patuluskon lomo ni roha ni Debata, tapi anggo halak pardosa dapot do baenonna.

²⁷Ligi ma, ninna Parhapistaran i: Dapot au do sudena i, di na hujalahi sian langka tu langka alusna.

²⁸Laing hujalahi dope alus na asing, hape nada marguna. Sian tonga-tonga ni saribu halak, dapot au do sada halaklahi na hupasangap. Tapi sian tonga-tonga ni halahi nada adong dadaboru na tarargai au.

²⁹Hum on ma na dapot au: Nada marlobian jana songon somalna do hita dijadihon Debata. Tapi hita saonnari do na mambaen hita rundut jana maralit-alit.