Read Batak Angkola PARJAMITA 8 Bible Online

PARJAMITA 8 - Batak Angkola bible

PARJAMITA 8

¹Tabona i antong halak na marbisuk. Diboto ia do alus ni sude parkaro. Mikim do ia marjop ni roha pambaen ni bisuk i, gabe mago ma sian bohina na markeruti.

²Patutna do muda raja mangalehen parenta, jana ulang mopop mambaen janji tu Debata.

³Tarbaen raja do martindak marroha-roha. Muda nada tumbuk tu rohania, gumonan ma padao sian ia.

⁴Mardongan sahalana do raja di tindakanna; nada adong na puluk manggagaisa!

⁵Halak na mangoloi parenta, sai na malua do i jana sonang. Halak na pistar diboto do sanga andigan jana bia mangoloi raja.

⁶Di sasude sanga na aha adong be do hatiha dohot dalanna sandiri, tapi otik sajo do na taastui.

⁷Umpe sahalak na mamboto sanga aha bagian sipainteon, jana nada adong na malo mandok sanga aha na giot tarjadi.

⁸Nada adong sahalak pe na tarbaen manahan sanga manyundati hamateanna. Paraloan na so tarpasidingsa do i, nada tarbaensa malua sian i, haru pe mardongan sipaoto-oto dohot na mangakali.

⁹Huida do sudena on di na huparrohahon halolojamu, salolot di ngolumu di tano on. Huhul dipake jolma i do kuasona laho mangarugii donganna jolma.

¹⁰Jungada do huida mate halak na jahat lalu dikuburkon. Tapi di na mulak au sian kuburan, hubege ma ia dipapuji-puji angka halak na di kota inganannia mambaen hajahatan i. Jadi, i pe magopo do.

¹¹Biasi songon i momona halak mambaen hajahatan? Hara ni na so manigor do dilehen uhuman.

¹²Haru pe dibaen sada pardosa saratus hajahatan, laing totop do ia mangolu jana umurna ginjang. Ninna, sanga ise na mangoloi Debata, mur maradu mura do ngoluna.

¹³Sabalikna, anggo halak na jahat dapotan bahat hasusaan. Tibu salpu ngoluna i songon halinu. Mate ma ia dompak poso dibaen nada mangoloi ia tu Tuhanna.

¹⁴Tapi sisoada do dohonon i sudena. Ligi ma sanga aha na tarjadi di tano on: Adong do halak na burju na hona uhum songon parjahat, adong do parjahat na dibalos songon halak na burju, jadi, i pe magopo do.

¹⁵Anggo panyimpulina di au, angkon marjop ni roha do jolma. Harana nada adong hasonangan na asing disia, di tano on di bagasan ngolunia asing ni na mangan, minum dohot marjop ni roha. Hum i sajo do na tardai di tonga-tonga ni halolojana, di bagasan ngolu na nilehen ni Debata disia.

¹⁶Di na huparayak manjalahi habisuhon jana huparrohahon sude na tarjadi di tano on, gabe huboto ma haru pe markarejo hita arian na borngin nada maradian,

¹⁷nada malo hita mangastui karejo ni Debata. Sanga na bia pe tabaen, nada mungkin hita mangastuisa. Dioku halak na pistar do na ummalo ia, tapi anggo na satutuna nada diboto ia.