Read Batak Angkola PARJAMITA 9 Bible Online

PARJAMITA 9 - Batak Angkola bible

PARJAMITA 9

¹Hupikiri do i tangkas sudena. Diatur Debata do ngolu ni halak na burju jana na marroha, na margoyak ni roha, bope halak na marroha holong. Nada adong na umboto sanga aha na giot masa di pudian ni ari.

²Tutu do nian, sarupa do bagian na mandondoni ganop jolma: Halak na jujur sanga halak na jurngit, halak na burju sanga pe halak na jahat, halak na ias sanga pe halak na hodar, halak na manghaulkon haul sanga na so marhaul. Nada dumohar halak na burju sian halak na mardosa, mandosdos do halak na marsumpa dohot halak na so ra marsumpa.

³Jadi, sarupa do bagian na mandondoni halahi sudena. Nada tigor songon i laing songon sude na masa na di tano on. Salolot di ngolu ni jolma i gok hajungkaton do rohana jana pikiranna pe gok haotoon do. Dung i tompu ma ro ajalna.

⁴Tapi salolot mangolu pamatangniba, salolot ni i ma adong arop ni roha. Nada he maruntungan anjing umpado singa muda mangolu anjing i jana singana i mate?

⁵Palamani, diboto jolma na mangolu na inte do hamatean disia, hape anggo na mate nada dibotosa bagi aha. Nada adong disia upa sanga pamaloson, jana goarnia pe ma pola dihalupahon.

⁶Holong ni roha, hagigian maradu hagiotnia mate do sudena i rap dohot ia. Nada be maruli ia di bagi aha di bagasan sude na masa di portibi on.

⁷Tole, mangan ma jana marjop ni roha, inum ma anggurmi marmoga-moga. Nada muruk Debata, mur jop noma rohaNia.

⁸Padiar ma jeges bohimu jana tata.

⁹Pangkilalahon ma tabo ni ngolu rap dohot dongan saripemu salolot di ngolumu na magopo i, na nilehen ni Debata di ho di tano on. Angke hum i sajo do upa ni halolojamu.

¹⁰Karejohon ma sude karejomu sagogomu. Angke nada adong be naron sipikiran dohot karejo. Nada adong ilmu sanga bisuk anggo di inganan ni na mate. Jana marayak tusi do ho kehe.

¹¹Adong dope na huida di tano on: Nada sai tongtong parlojong na hipas manghamonangkon parsiaduan, nada sai tongtong halak na gogo manghamonangkon paraloan. Nada sai tongtong halak na marroha dapotan pangomoan. Jana halak na pistar nada sai tongtong dapotan sinadongan. Songon i angka na malo nada sai tongtong tarbonggal. Angke sanga na ise pe bolas jadi do hona bagian sial.

¹²Nada diboto jolma sanga andigan dapot hatihana. Songon unggas na hona jorat dohot ihan na hona jala, songon i muse do jolma hona mara di hatiha na so ditagam roha.

¹³Di tano on adong do tiruan na denggan na huida. Salaho tu parnidaan ni jolma maradopkon habisuhon:

¹⁴Adong ma sada kota na menek, otik do halakna. Sanoli ro ma sada raja na sangap mamorangi kota i. Dihobuk ia ma kota i jana marhobas ma ia laho mangarumpakkon tembokna i.

¹⁵Adong do sada halak na marbisuk di kota i. Jadi gabe malua ma kota i dibaen ia. Tapi hara ni na pogos ia, manigor dihalupahon ma pambaenannia i jana umpe sahalak na marningot ia.

¹⁶Jadi gabe tutu ma pandapotki bahaso na disalpui habisuhon do kuaso. Haru songon i pe, nada diargahon anggo bisuk ni halak na pogos. Angka hata na nidoknia nada siparrohahonon sudena i.

¹⁷Gumonan do pabege-bege hata taringot tu halak na pistar umpado parsurak ni sada parkuaso di tonga-tonga ni angka jolma na oto.

¹⁸Margunaan do bisuk sian sinjata, tapi hara ni asom na saotik sego ma susu sabalanga.