Read Batak Angkola ENDE NA GODANG 2 Bible Online

ENDE NA GODANG 2 - Batak Angkola bible

ENDE NA GODANG 2

¹Anggo au bunga mawar na di Rura Saron, bunga bakung na di rura ni dolok.

²Songon bakung na di tonga-tonga ni sihupi, tarsongon i ma di tonga-tonga ni angka bujing-bujing haholonganki.

³Sian tonga-tonga ni halaklahi, tarsongon bona ni sipanganon di harangan do haholonganki. Jop rohangku marsilaung di toruna i, angka batuna pe antong daina tonggi.

⁴Dioban ia do au tu bilik parpestaan, manatap ia tu au gok holong ni rohana.

⁵Sai ra ma ho margogoihon au, marhite manisan ni batu ni anggur. Patogar ma au dohot angka parbatu, angke marnyae lungun jana gale do au.

⁶Tanganna siambirang manggolom ulungku, tangan siamunna ma manghaol-haol pamatangku.

⁷Husumpai ma hamu, ale boru Jerusalem, marhite ursa dohot hije na linca, ulang pabangkit hamu por ni roha, andorang so dihatihana.

⁸Tangihon ma! Sora ni haholonganku! Madung ro ia marlojong sian angka dolok, mangalumpat-lumpat di ginjang ni angka tor.

⁹Tarsongon hije haholonganki, sanga anak ni ursa. Ligi ma, majongjong do ia di balik ni dingding, mangintip-intip do ia sian jandela jana mangaligi sian lubang-lubang.

¹⁰Tangihon, haholonganku mandok hata. Beta, ihutkon ma au, na uli di au,

¹¹Ma pola salpu musim ngali, nonat pe madung abis.

¹²Ma pola kombang angka bunga di ladang; on ma hatihana marsiende-endean. Tarbege do sora ni hatutu di tanonta.

¹³Mamungka ma mamutik batu ni hayu ara; bunga ni anggur pe manguskus uapna. Ro ma ho, hasian, ro ma tuson!

¹⁴Biasi martabuni ho, haholongan? Patuduhon ma jogi ni rupami, patubegehon ma jeges ni sorami.

¹⁵Hamu ale angka dongan, tangkup hamu ma di hami, sorigala na menek-menek, painte so sanga dope halahi manyegohon kobun anggur na topet hajegesanna.

¹⁶Au do nampuna haholonganki, jana ia do nampuna au; di holang-kolang ni bunga bakung ia marmahan biri-biri

¹⁷lopus mangombus alogo ni ari manyogot, di na kehe hagolapan dipaorot. Mulak ma, hasudungan, songon ursa jantan, na ro sian luat partoran.[2]