Read Batak Angkola ENDE NA GODANG 3 Bible Online

ENDE NA GODANG 3 - Batak Angkola bible

ENDE NA GODANG 3

¹Dompak borngin di podomanku, huipi do salaho tu hasoloan ni rohangku. Hujalahi ia, hape nada dapot au.

²Ngot au, lalu hubolusi kota manjalahi, hujujur sude dalan dohot lorong. Hujalahi haholonganki, hape nada dapot au.

³Tarpaida au ma panjago ni kota, ningku ma, “Adong dehe tarpaida ho haholongan ni rohangku?”

⁴Hutinggalkon halahi, lalu dapot au ma ia, jana nada hupadiar ia kehe; togu hutiop lopus huoban ia tu bagas ni dainang; tu bilik ni dainang na manubuhon au.

⁵Husumpai hamu, ale boru Jerusalem, songon ursa dohot hije na linca, ulang pabangkit hamu por ni roha andorang so dihatihana.

⁶Ise dehe i na ro sian padang-padang an, tarsongon timus na suman tu tiang? Huskusna songon mur dohot dupa, dupa na nigadis ni parboniaga.

⁷Si Salomo do i na juguk di habangsana; na niboan ni onom pulu halak perwira, sian antara ni pahlawan-pahlawan ni Israel.

⁸Na ummalo padalankon podang, jana na marpangalaman di bagasan porang. Marsioban do i podang na hobas ampot ro borngin-borngin na mamorangi.

⁹Diboan do si Salomo di ginjang tandu na sian hayu na ummarga situtu.

¹⁰Tiangna i na nibaen do sian perak; parsisandeanna sian sere na sumirlak. Abit na bunga torung manutupi juguhanna, na nisulaman ni boru Jerusalem mardongan holong ni roha.

¹¹Hamu angka boru Sion, ligi hamu ma, Raja Salomo mamake tuku dipapakehon inangna di ari parbagasonna, di ari na marjop ni roha ia.