Read Batak Angkola ENDE NA GODANG 4 Bible Online

ENDE NA GODANG 4 - Batak Angkola bible

ENDE NA GODANG 4

¹Na uli di au, na sumurung ma antong jogi ni rupamu, di balik ni panutupi ni matamu torang do holong ni roha. Obukmu manortori songon pahan-pahanan sahulanan; na manuat di angka dolok ni Gilead.

²Iponmu bontar marsinondang songon biri-biri na niparmahanan, na baru dicukur jana diparidi. Singkop jana nada adong hurangna togu jana tiptip sudena.

³Muda mangkuling ho, manis ni bibirmu songon pita na rara. Jeges ni hurummu songon batu ni dalimo, di balik ni panutupina.

⁴Rungkungmu songon palas-palas ni si Daud, hibul jana lemes. Borgokmu tudos tu saribu parince ni pahlawan.

⁵Adop ni andoramu songon ursa sidua-dua, hije linduat na manjampal di tonga-tonga ni bunga.

⁶Por rohangku maringanan di dolok mur, di rura hamonyan, lopus mangombus alogo manyogot, jana mago hagolapan.

⁷Uli nai ho, ale haholongan, nada adong tihasmu.

⁸Ro ma ho tu au sian Dolok Libanon, ale dadaboru tunanganku, manuat ma ho sian puncut ni Dolok Amana, sian Dolok Senir dohot Dolok Hermon, sian liang-liang ni singa, dohot dolok inganan ni angguliman.

⁹O haholongan ni rohangku na huririt, panailimu, dohot borgok na di rungkungmu mambaen sai tu ho rohangku.

¹⁰Tabo ni holongmi ale tunanganku, tumabo do holongmi sian anggur; humuskus do miak na dipakemi sian sude rempah-rempah!

¹¹Manis ni bibirmu pe satonggi ni aer ni loba, ale anggi hasianku, susu dohot aer ni loba do dilamu di au. Uap ni Libanon na huskus lohot di pakeanmu.

¹²Anggi, tunanganku, songon sada kobun na buni do ho; kobun na martembok, dohot mata aek di bagasan.

¹³Angka tumburmu songon kobun dalimo, dohot angka parbatuna na tabo; bunga haturangga dohot narwastu.

¹⁴Tubu ma disi narwastu dohot hunik, tobu dohot hulim, dohot sude ragam ni hayu na margota na huskus; mur dohot aloe, dohot parmasak marragam rupa.

¹⁵Songon pansur do ho di bagasan kobun, jana songon mata mual hangoluan; songon batang aek na mabaor sian Libanon.

¹⁶Ngot ma ho, ale alogo Selatan dohot ho alogo sian Utara, mangombus ma di kobunku anso manguap huskusna i. Piohon ma haholonganki tu kobunnia i, laho mandai tabo ni angka parbatu ni hayu na nipili.