Read Batak Angkola ENDE NA GODANG 6 Bible Online

ENDE NA GODANG 6 - Batak Angkola bible

ENDE NA GODANG 6

¹Tu dia do haholonganmi, o bujing na jumogi, sabola tu dia do kehena, anso dapot hami manjalahisa?

²Na kehe tu kobunna do haholonganki, di kobun parmasak do marmahani biri-biri dohot mamutiki angka bunga bakung.

³Au do nampuna haholonganki, jana ia do nampuna au; diparmahani ia do biri-birinia di tonga ni bunga bakung.

⁴Jeges do ho, haholonganku, songon kota Tirsa, jengkar songon kota Jerusalem! jagar songon tentara na maroban angka mandera.

⁵Ulang ale manaili ho tu au, dibaen tarhalomong do au hara ni pangaligimu. Obukmu songon habanan ni hambeng, na margalumbang manuat di angka partoran Gilead.

⁶Iponmu mamontar marsilo-siloan, songon bontar ni biri-biri na baru niparidian; na maranak sidua-dua sudena, na so maranak nada adong.

⁷Hurummu songon rara ni dalimo, tarida ma i di balik ni panggupgupi ni bohimu.

⁸Haru pe onom pulu sorangan ni raja i, ditamba radingna salapan pulu nari, dohot bujing-bujing na so habilangan, hum sada ma i na ni haholongan.

⁹Songon darapati jogi ni rupana, anak sisada-sada hasian ni inana. Tarpandang do ia jana dadaboru mamujisa, salang namora ni raja dohot radingna dohot marhajopkon ia.

¹⁰Ise dehe na ro i songon parbincar ni mataniari, uli songon bulan tula dohot manyirlak songon las ni ari; jagar songon tentara na maroban angka mandera?

¹¹Tu kobun ni buah pala au manuat, mangaligi angka tunas na di rura; mangaligi betak na dung martunas do anggur, jana angka dalimo marbunga.

¹²Nada manyodar au; lungun ni rohangku do, na pajugukkon au di ginjang kareta ni na sangap.

¹³Mulak ma, mulak ma ale dadaboru Sulam, mulak ma, mulak ma anso bisa hami ligi ho! Biasi dehe por rohamunu mangaligi, dadaboru Sulam i songon na manonton tor-tor parporangan?