Read Batak Angkola ENDE NA GODANG 7 Bible Online

ENDE NA GODANG 7 - Batak Angkola bible

ENDE NA GODANG 7

¹Si bujing na sumurung hajogian, patmu na marsandal sai lohot tu roha di bagasan. Lengkuk ni gontingmu songon na nitukangan, karejo ni sada bayo parsinaloan.

²Pusotmu pe songon sambong na jeges, na sai bubung anggur pake ramuan. Butuhamu songon gandum na ditimbun, na marhandangkon angka bunga bakung.

³Adop ni andoramu songon jeges ni ursa sidua-dua, tarsongon anak ni hije silinduat.

⁴Rungkungmu suman tu menara gading, ginjang lele ma i boti langsing. Matamu pe tudos tu tobat na di lambung ni horbangan kota Hesbon. Igungmu songon jagar ni menara Damaskus na di Libanon.

⁵Ulumu tu ginjang dorgak, songon Dolok Karmel gakgak. Obukmu tudos tu sutra na lamot gergerna, tarhalomong raja i patunda ni na so tarhatahon jegesna.

⁶Jeges nai, jengkar nai ho, ale na lumobi ni haholongan sian sasude na nihalomohon.

⁷Pamatangmu songon tongam ni bona ni harambir, adop ni andoramu tarsongon parsusun ni batu ni harambir.

⁸Por rohangku manaek bonana i, dohot mamutikkon angka batuna i. Songon sangkaraing batu ni anggur do di au adop ni andoramu. Songon huskus ni batu ni appel uap ni hosamu.

⁹Pangkobarionmu tonggi songon anggur! Durus tu haholonganku ma nian anggur i marlobi-lobi di bibirna dohot pamangannia i.

¹⁰Haholonganku do nampuna au; por do rohania di au.

¹¹O hasianku, beta hita tu padang, jana marborngin di tonga-tonga ni angka bunga na kombang.

¹²Ngot ma hita di andostorang, paresoonta ma kobun anggur, betak na dung adong tunasna martumbur jana masarsar bungana. Betak na dung marbunga do dalimo, disi ma holong ni rohangku hulehen tu ho.

¹³Bona ni sihuskus urat muab huskusna, angka batu ni hayu na tabo di lambung ni pintunta. Madung huparade di ho, ale haholonganku hataboan ni na lolot dohot na imbaru.