Read Batak Angkola JESAYA 1 Bible Online

JESAYA 1 - Batak Angkola bible

JESAYA 1

¹Marisi angka tona do buku on salaho tu Juda dohot Jerusalem na nipatorang ni Debata tu si Jesaya, anak ni si Amos, di hatiha ni si Usia, si Jotam, si Ahas dohot si Hiskia mamarenta di Juda.

²Didok TUHAN ma, “O, langit dohot tano tangihon ma na Hudok! Angka dakdanak na Hupature-ture mangalo do tu Au.

³Ditanda lombu do nampunasa, jana ditanda halode do palangka na nibaen ni tuanna. Hape anggo bangsongKu Israel umpe diboto bagi aha. Tutu situtu ma na so umboto sanga aha halahi.”

⁴Marjaya ma hamu bangso pardosa, angka halak na so ture jana na jahat pomparan ni angka parjahat, angka dakdanak na marparange na jat! Ditulak jana ditinggalkon halahi do TUHAN Na Sun Badia i, Debata ni Israel, jana manghudukkon Ia.

⁵Biasi dope he angkon sai manggagai hamu? Adong he na giot baenon dope uhuman na umborat tu hamu? Ma sap sude ulumu baro-baroon, rohamu pe dohot pikiranmu marnyae.

⁶Sian ambubumu lalu tu palampak ni patmu umpe adong be pamatangmu na so hona nyae. Marlombaman sude pamatangmunu, marbosari jana mangkabugang. Nada dipaias sanga dibalut dope angka bugangmunu i. Nada muse diubati dohot miak.

⁷Madung disego-sego sude luat ingananmu; angka kotamunu pe madung disurbu. Laing di jolo ni matamu dibuat halak na asing tanomu lalu disego-sego sudena.

⁸Hum Jerusalem noma na tinggal, i pe laing na hona hobuk ma i na so margeldok, songon sopo di kobun anggur sanga songon undung-undung di kobun ancimun.

⁹Sugari sura nada dipalua TUHAN Na Markuaso i piga-piga halak, anggo Jerusalem i madung mago sude, sarupa tu Sodom dohot Gomora.

¹⁰Tangihon ma hata ni TUHAN ale angka pamimpin na songon pamimpin ni Sodom! Tangihon ma tona ni Debatanta ale rayat na songon rayat ni Gomora!

¹¹Didok TUHAN do, “Diambang hamu do lakna jop ma rohangKu hara ni sude haul na sai nihaulkonmunu i tu Au? Madung magigi Au mida biri-biri haulmunu na nitutung i dohot di tabo-tabo ni anak ni lombu i. Nada ringkot rohangKu mida mudar ni lombu jantan, biri-biri dohot hambeng i.

¹²Ise dehe marsuru hamu mamboan haul i sude muda ro hamu marsomba tu Au? Ise dehe marsuru hamu malat-alat di BagasKu Na Badia i?

¹³Parcuma do diparobani hamu haul i sude. Gialan Au manganggo uap ni hamonyan na nitutungmunu i. Goyak rohangKu jana magigi Au paida-ida hamu manghagodangkon Bulan Na Imbaru, angka Ari Sabat dohot angka ari pesta maradu sude angka parlagutan parugamoan. Sude do i dipahodar hamu dohot angka dosamunu jana gabe boban sitanggunganKu; maloja Au mamorsan i.

¹⁵Muda pe diangkat hamu tanganmunu martangiang, nada Huterge be i. Nada parduli Au sanga na sadia bahat tangiangmunu i, nada ra Au manangihonsa angke dohot tanganmunu i madung bahat hamu mamunu.

¹⁶Basu hamu ma jolo dirimunu lopus ias. Antak hamu ma sude hajahatan na nibaenmunu i. Olo, ulang be didatdati hamu mambaen na jat,

¹⁷marsiajar ma hamu mambaen na denggan. Gogohon hamu ma anso tulus mardalan hatigoran — urupi ma halak na hona hapit; pasahat ma tu na so marama so marina na patut bagianna jana ondihon hamu ma angka na mabalu.”

¹⁸Ninna TUHAN do: “Ro ma hamu anso tapadenggan. Haru pe rara dosamu songon kirmisi, ias do baenonKu songon itak, haru pe rara songon hasumba, bontar do baenonKu songon hapas.

¹⁹Muda ra hamu burju mangoloi Au, daionmunu do sandok na denggan suha ni tanomunu i.

²⁰Tapi muda mangalo do hamu tu Au, pasti mate noma hamu. Au, TUHAN madung mandok i.”

²¹Kota na burju najolo, saonnari gabe songon siboru jalang! Najolo burju halak kota i, hape anggo na adong saonnari hum sibunu jolma noma.

²²Na songon perak humani do ho ale Jerusalem, hape saonnari madung gabe jatjat. Songon anggur humani do ho, hape saonnari madung songon aek sajo noma.

²³Angka pamimpinmu halak na sai mangalo do jana kaki tangan ni panangko; sai dihagioti halahi do manjagit silua dohot suap. Nada unjung halahi ra mangondihon na so marama so marina di pangadilan; nada diampirkon halahi angka na mabalu na mangaduhon parkarona.

²⁴Hara ni i songon on ma didok Tuhan, TUHAN Na Markuaso na mangondihon Israel, “BaloshononKu ma hosom ni rohangKu tu angka alongKu, jana baenonKu ma pamaloson tu angka musungKu.

²⁵PalaluonKu noma tu hamu tindakan. Songon halak na papitahon simbora, papitaonKu noma hamu; sude na hodar, buatonKu ma sian hamu.

²⁶LehenonKu ma angka pamimpin dohot angka na mangalehen sipaingot mangulahi songon najolo. Jadi gabe goaran ma Jerusalem kota na tigor dohot na burju.”

²⁷PaluaonKu ma Sion di bagasan hatigoran, dohot halak na paubahon rohana.

²⁸Tapi sandok na mardosa dohot na mangalo maradopkon Ia, pasidungonNa do i, jana sandok na manadingkon Ia, bunuonNia do i.

²⁹Manyosal noma hamu hara ni na dung jungada hamu marsomba parhayu dohot na paradehon angka kobun gabe hapunjungan ni angka debata.

³⁰Malos ma hamu songon hayu na bolon na giot rahar, songon dia kobun na so niaehan.

³¹Songon durame na puntung dibaen gurasa ni api, songon i muse ma angka halak na markuaso luntahon ni angka pambaenan ni halahi sandiri, jana nada adong na tarbaen mangantak haroroncona i.