Read Batak Angkola JESAYA 14 Bible Online

JESAYA 14 - Batak Angkola bible

JESAYA 14

¹Giot asian ni TUHAN ma Israel bangsoNia i, jana manodo halahi mangulahi gabe nampunaNia. Giot baenonNia ma halahi mangulahi maringanan di tano ni halahi sandiri. Marroan ma halak na asing jana maringanan disi rap dohot halahi.

²Bahat bangso na giot mangurupi bangso Israel anso mulak halahi tu tano na nilehen ni TUHAN tu halahi, jana gabe hatoban ma angka bangso i disi tu Israel. Tabanon ni Israel ma angka halak na dung jungada manaban halahi jana parentaonna ma na unjung mamisat halahi.

³Giot paluaon ni TUHAN ma Israel sian parhancitan dohot pardangolanna dohot sian karejo na borat na nipaksahon tu halahi.

⁴Muda dung dipatulus Tuhan songon i, angkon incahan ni halahi do raja ni Babel mandok songon on: “Madung madabu raja na jahat i! Nada tarbaensa be mamparhanciti.

⁵Madung diantak TUHAN pangarajaion ni angka parkuaso na jahat

⁶na manyosak marhite murukna jana sai torus mamparhanciti angka bangso na nitaluhonna.

⁷Ujungna gabe aman jana dame noma sude portibi on, jana marende ma sude jolma marjop ni roha.

⁸Marmoga-moga dohot hayu ares dohot sampinur Libanon hara ni na dung madabu raja na kejam i, jana hara ni parkehena i, nada adong be halak na marsuru manaba halahi!

⁹Madung rade hamatean laho manyambut manjaluangi raja ni Babel i. Gabe tarsunggul ma sumangot ni angka halak na markuaso narobi di tano on, dohot sumangot ni angka raja marjongjongan ma sian habangsa ni halahi.

¹⁰Marsurak ma halahi pio-pio tusia, ‘He! Saonnari songon halahi noma ho, gale jana nada margogo!

¹¹Najolo dipasangap do ho mardongan musik ni hasapi, hape saonnari di na lungun ni hamatean noma ho. Angka binga noma podomanmu jana goya ma ulosmu.’

¹²O ale raja Babel, najolo bintang sidongdong na sumirlak do ho, hape saonnari ma pola madabu sian langit! Najolo ditaluhon ho do angka bangso, hape saonnari diompaskon ho tu tano.

¹³Anggo giot ni rohamu nian sai na giot tu langit, jana mambaen habangsamu di ginjang ni bintang pargincat! Diambang ho tarbaen ho ma juguk di ginjang ni dolok na di Utara, inganan parpunguan ni angka debata.

¹⁴Didok ho ma na giot manangkok ho tu puncu ni angka ombun jana gabe songon TUHAN Na Gumincat i.

¹⁵Hape dijulungkon tu na umbagas do ho sian sude inganan ni halak na mate.

¹⁶Tatapon jana marsuo ma halahi na disi tu ho. Sapa-sapa ma halahi, ‘On ma he bayo na mambaen humutur portibi jana na mambaen tarsonggot angka harajaan?

¹⁷Ia ma he ibana na manyegohon angka kota jana na manguba portibi gabe padang parhorsihan? On ma he ibana na so jungada paluahon angka halak na nitabanna i sanga na padiarkon halahi mulak?’

¹⁸Sude raja na satano on modom do di tanoman ni halahi na jeges sun,

¹⁹hape anggo ho umpe adong kuburanmu; diambungkon do bangkemu jana dipadiar gabe busuk didondoni angka bangke ni parporang na marmatean di bagasan porang, disampakkon rap dohot halahi tu bagasan liang batu lalu dilonca-lonca.

²⁰Disego-sego ho do antong tanomu jana dibunui ho bangsomu sandiri. Hara ni i ma da umbaen na so dikuburkon ho songon angka raja na asing i. Sahalak pe sian isi ni bagasmu na jahat i indangkan na adong malua.

²¹Pungkaon ma na mambante! Marmatean ma angka anakmu hara ni dosa ni ompu ni ompumu. Umpe sahalak be sian halahi na giot mamarenta di tano on sanga mamungka angka kota.”

²²Didok TUHAN Na Markuaso i ma, “Ro ma Au mamorangi Babel, lalu manyegohonsa. Umpe sahalak na malua baenonKu, salang dakdanak pe nada padiaronKu mangolu. Tuhan do Au, na mandok i.

²³Gabe ambar noma Babel baenonKu baen inganan ni sipauk. Ias ma haisonKu Babel. TUHAN Na Markuaso do Au, na dung mandok i.”

²⁴Marsumpa ma TUHAN Na Markuaso i: “Angkon tulus do sude na dung Husangkapkon i.

²⁵PusaonKu ma halak Asur na di Israel tanongKi jana na maringanan di angka dolok Hudege-dege ma i. PaluaonKu ma bangsongKi sian boban na nipaksahon ni halak Asur tu halahi.

²⁶Songon on do sangkapKu salaho tu portibi on; hortang do tanganKu laho manguhumi angka bangso.”

²⁷Madung putus roha ni TUHAN Na Markuaso i laho patupahon songon i. Hortang do tanganNia hobas laho manguhumi, jana nada adong sahalak pe na bolas manyundati Ia.

²⁸On ma tona na nipabotohon di taon hamamate ni Raja Ahas.

²⁹O ale bangso Pilistin, madung maponggol potuk-potuk na nipake laho mamukul ho. Tapi ulang pola marjop ni roha ho, angke muda mate pe sada ulok, laing ro do ulok na jumahat manggontisa, jana manotas ma pira ni ulok jana ruar ma naga na marhabong.

³⁰Haru na umpogos sian bangsongKu maduma sipanganon, jana angka halak na pogos sonang ma mangolu. Tapi masa ma haleon potir tu halak Pilistin, gabe mate ma halahi sude.

³¹Martangisan ma hamu, jana marsurahi mangido tolong, hamu ale angka kota ni Pilistin! Humitir ma hamu sugari nian mabiar! Marbual-bual do abuan sian Utara tanda ni haroro ni tentara na garang-garang; nada adong sahalak pe sian halahi parbiar.

³²Aha ma ulaning alusta tu angka suruan na ro i sian Pilistin? Tadok ma tu halahi bahaso na dung dipauli TUHAN, Sion jana disi ma dapotan pangondian bangsoNia na marhancit.