Read Batak Angkola JESAYA 17 Bible Online

JESAYA 17 - Batak Angkola bible

JESAYA 17

¹Didok Debata, “Nada marrumangkon kota be Damaskus, tapi hum na sego-sego sajo noma.

²Tadingkonon noma angka kota ni Siria salolot-lolotna jana gabe inganan ni pahan-pahanan noma i; umpe adong sahalak na mangayaksa.

³Nada margogo Israel jana mago ma habebason ni Damaskus. Mangolu di bagasan habilean ma halak Siria na tinggal i, songon halak Israel. Au, TUHAN Na Markuaso, madung mandokkon i.”

⁴Didok TUHAN, “Muli dapot do i hatihana marujung bungaran ni Israel, jana hamoraonna i digonti dohot hapogoson.

⁵Songon saba na dung nisabi noma Israel, jana songon lungun ni ladang na di Rura Refaim muda dung salpu sabion.

⁶Tarsongon zetun na abis diputik batuna, hum sada dua na tinggal di puncutna i jana adong sanga na piga di dangka na toruk-toruk, laing songon i ma di Israel, saotik sajo do halak na malua. Au, TUHAN, Debata ni Israel, madung mandokkon i.”

⁷Di ari i, mangulahi ma halak mangido tolong tu na manompasa, Debata Na Badia ni Israel.

⁸Indada be mararop ni roha halahi tu suha ni parkarejoan ni halahi sandiri, i ma angka langgatan inganan panutungan ni dupa, dohot angka patung ni debata boru-boru Asera.

⁹Di ari i, gabe ropuk-ropuk jana mamolngit ma angka kota na togu partahananna, songon kota na nitadingkon ni halak Hewi dohot Amori di na maporus halahi sian halak Israel.

¹⁰O Israel, madung dihalupahon ho Debata na paluahon dohot na manjagohon ho songon dolok batu na tohong. Balik do, madung disuani ho angka kobun laho marsomba angka debata.

¹¹Tapi haru pe manigor martunas suan-suanan i jana marbunga di ari i di na manyuan i ho, hapengani anggo suhana indangkan na adong buaton. Hum hasusaan do taononmu dohot hahanciton na so ra mago.

¹²Angka bangso na gogo gabe tarsonggot, sorana songon husasak ni laut dohot sora ni ombak na gogo.

¹³Ro ma halahi songon ombak na margulung-gulung. Tapi dipaingot TUHAN ma halahi, gabe sumurut ma halahi, dihais songon abuan di lereng ni tor sanga songon guapak diombus haba-haba.

¹⁴Hatiha lusut mataniari dibaen halahi hagaoron, tapi marayak andostorang nada adong be halahi. Songon i ma bagian ni ganop halak na manyamun hita.