Read Batak Angkola JESAYA 19 Bible Online

JESAYA 19 - Batak Angkola bible

JESAYA 19

¹On ma tona salaho tu Mesir. Ro do TUHAN tu Mesir manengget ombun na hipas. Humitir ma angka gana-ganaan ni Mesir di joloNia jana menek ma roha ni halak Mesir marnidasa.

²Didok TUHAN, “PamasaonKu ma na marsiporangan di Mesir. Marsibunuan ma na sada tu na asing angka na markahamaranggi, jana na pahombar tu hombarna. Angka kota na maralo, marsiporangan noma jana angka raja-rajana marsibunuan, marsirampasan kuaso ma.

³SundatanKu ma angka sangkap ni Mesir jana manderse halahi baenonKu. Pangidoon ni halahi ma pangurupion tu angka gana-ganaan, mangido piruang dohot panogu-noguon tu angka datu dohot angka tondi.

⁴PasahatonKu ma Mesir tu tangan ni sada raja na jungkat na giot mamarenta halahi mamake hakejamon. Au TUHAN Na Markuaso do mandok i.”

⁵Surut ma aek ni Batang aek Nil jana mur lolot mur mahiang.

⁶Muap bau ma angka bondar di na mur abis aekna i. Marmalosan ma angka arung dohot duhut.

⁷Mahiang ma sude parsamean na adong di topi-topi ni Batang aek Nil i sude lalu diombuskon alogo.

⁸Mariale jana mangandungi ma angka parihan na somal manangkup ihan di batang aek i jana nada marguna be jala ni halahi i.

⁹Mandele ma angka na martonun abit linen.

¹⁰Marsak ma roha ni angka partonun dohot parkarejo na niupa jana manderse be.

¹¹Na santak antong bodona angka pamimpin ni kota Zoan! Halak Mesir na umbisukna pe mangalehen sipaingot na lobi oto! Puluk ma da halahi mandok tu raja i paboahon na pomparan ni angka halak na marroha dohot raja-raja sian na robi halahi!

¹²O ale raja ni Mesir, dia ma he panuturi ni raja angka na malo-malo i? Betak na diboto halahi do antong sangkap ni TUHAN Na Markuaso i salaho tu Mesir.

¹³Jolma na bodo do angka pamimpin di Zoan dohot Memphis. Nanggo na mamimpin halahi, na mur paliluhon bangso i noma dohonon.

¹⁴TUHAN do na mambaen halahi mangalehen sipaingot na paguga-gugahon. Jadi gabe marsalaan ma antong sude na nipambaenan ni Mesir i jana pardalanna i pe songon na mabuk noma marunjoman jana tarsilandit di uta-utana i sandiri.

¹⁵Sahalak pe nada adong be di Mesir na tarbaen mangurupi, sian parkuaso dohot sian rayat, sanga halak na godang bope na bile.

¹⁶Dapot do hatiha ni i, gabe songon dadaboru parila jana parmombut bangso Mesir. Mabiar noma halahi muda diidasa TUHAN Na Markuaso i mangambalkon tanganNa laho manguhumi halahi.

¹⁷Madung dibaen TUHAN Na Markuaso i haputusan taringot tu halahi. Ganop disungguli haputusan i tu halahi, humitir ma halahi maradopkon bangso Juda.

¹⁸Anggo di hatiha i, pakeon ma hata Ibrani di lima kota ni Mesir. Marsumpa mangasahon goar ni TUHAN Na Markuaso i noma angka halak na maringanan disi. Goaron ma sada sian kota na lima i “Kota Mataniari”.

¹⁹Anggo di hatiha i adong noma sada langgatan di TUHAN ingananna di tonga-tonga ni Luat Mesir, jana di parbatasan ni Mesir i adong sada tiang na nibaen hasurungan ni TUHAN.

²⁰Langgatan dohot tiang i ma songon tanda ni na ro TUHAN Na Markuaso i di Mesir. Muda hona sosak bangso i, gabe pio-pio halahi mangido tolong tu TUHAN, suruhononNia ma sada halak na paluahon halahi.

²¹Patangkason ni TUHAN ma diriNa tu bangso Mesir, lalu tandaon jana sombaon ni halahi noma Ia, jana obanon ni halahi ma haul sisambolon dohot haul sipanganon diSia. Mambaen janji ma halahi mardongan sumpa tuSia jana karejohonon ni halahi ma songon sumpana i.

²²Uhumon ni TUHAN ma bangso Mesir, tapi dung salpu i pamalumonNia do halahi. Mulak ma halahi tu TUHAN, jana tangihononNia ma tangiang ni halahi lalu mangalehen hamalumon.

²³Di hatiha i, adong noma dalan godang antara ni Mesir dohot Asur. Markehean ma halak na mangingani luat na dua i mamolus sian dalan i jana rap maribadat ma halahi.

²⁴Anggo di hatiha i, gabe sarupa noma arga ni parjuguk ni Israel dohot Mesir dohot Asur, jana gabe pasupasu ma bangso na tolu i di na satano on.

²⁵Pasupasuon ni TUHAN Na Markuaso i ma halahi jana dokkonon noma, “PasupasuonKu ma, ho ale Mesir bangsongKu, ho ale Asur na Hujadihon, dohot Israel bangso na Hupili.”