Read Batak Angkola JESAYA 23 Bible Online

JESAYA 23 - Batak Angkola bible

JESAYA 23

¹On ma alatan taringot tu Tirus: Mangandungi ma hamu, ale angka parlaut ni Tirus na mamolusi laut bidang jana na topet marlayar sian Siprus! Harana madung dironcohon Tirus, kota labuanmunu i; angka bagas dohot labuanmunu i madung gabe tinggal na sego.

²Humolos ma hamu, angka saudagar ni Sidon! Angke, somalna ditongos hamu do angka suruanmunu

³tu ipar ni laut laho marboniaga gandum na tubu di Mesir dohot laho marboniaga tu sandok bangso.

⁴O kota Sidon, madung pola mago hasangapanmu! Nada diokui laut na bagas be da ho, ninna do, “Nada jungada au mardakdanak dope, nada unjung dope hupagodang-godang anak halaklahi sanga dadaboru.”

⁵Salangkan halak Mesir pe gabe humitir-hitir ma jana gaor muda dung tarbege na dung dironcohon kota Tirus.

⁶Mangandungi ma hamu panduduk ni Penisia, kehe ma hamu monjap tu Spanyol.

⁷Ligi ma Tirus hutami na adong sian narobi. On ma he ibana kota na somal marjop ni roha? On ma he kota na marsuru angka jolma taripar laut laho mangaranto tu luat na dao.

⁸Nada he angka saudagarna i do anak ni raja tubu ni na mora na umbahat dipasangap di tano on? Ise dehe na mambaen haputusan laho mandabuhon Tirus kota na umbahat kuasona i?

⁹TUHAN Na Markuaso i, Ia do na mambaen haputusan i. Diputuskon Ia ma laho paujungkon ginjang ni roha ni halak na disi hara ni sude suha na dapot ni halahi jana patorukkon angka halak na sumangap sian tonga-tonga ni halahi.

¹⁰Karejohon hamu ma ladangmunu, ale hamu halak Spanyol, harana nada adong be labuan.

¹¹Madung dipatoltol TUHAN tanganna di ginjang ni laut jana ditunggalingkon angka harajaan. Diparenta Ia do Kanaan anso dironcohon angka benteng ni Penisia.

¹²Didok Ia ma, “O kota Sidon! Madung marujung jop ni rohami. Madung tarsosak pangisimu. Haru pe mangungsi bage halahi tu Sidon, nada sonang halahi.” (

¹³Bangso Babel do, jana nada bangso Asur na pasahatkon kota Tirus tu binatang panyoro i. Laing halahi muse do na pajongjongkon angka palas-palas pangkobuhan, mangarumpakkon angka benteng ni Tirus jana padiarkon kota i gabe tinggal sego-segona.)

¹⁴Mangandungi ma hamu ale angka parlaut! Madung maronco kota na nipangasahonmunu i.

¹⁵Dapot do i hatihana, angkon halupahonon kota Tirus pitu pulu taon honokna, sarupa dohot umur ni sada raja. Muda dung salpu hatiha i, sarupa dohot boru jalang noma kota Tirus songon hata ni ende on:

¹⁶Buat ma hasapi, dalani ma kota on, o, boru jalang na nihalupahon! Piltik ma hasapi i, marende ho mangulahi, anso diingot ho mangulahi.

¹⁷Dung abis na pitu pulu taon i, ingoton ni TUHAN ma Tirus jana paloasonNa ma ia mambaen karejona sinajoloan. Marboniaga ma ia dohot harajaan na di tano on.

¹⁸Haulkononnia ma tu TUHAN labo dohot upa na dapotnia jana nada simpanonna. Pargunahonon ni angka halak na manyomba TUHAN ma i baen panobusi ni balanjo dohot pakean na porlu di halahi.