Read Batak Angkola JESAYA 26 Bible Online

JESAYA 26 - Batak Angkola bible

JESAYA 26

¹Di hatiha i, endehonon ni halak ma ende on di tano Juda: “Na tohong ma da kotanta on; madung dipajongjong TUHAN, tembok dohot benteng.

²Bukahon bo horbangan ni kotanta, suru ma masuk bangso na setia, bangso na tongtong tigor.

³Dilehen Ia do dame dohot hasonangan tu halak na togu rohana, hara ni na porsaya ia tuSia.

⁴Sai haporsayai ma tongtong TUHAN, harana TUHAN DEBATA do dolok batu na manongtong.

⁵Patutoruon ni TUHAN do halak siginjang roha, jana pangabisonNia kota ni halahi bagi na bia pe toguna, angka tembokna i maropuk marsampahan tu abu.

⁶Angka na pogos jana na dangol i ma mandege-degesa.

⁷Lidang do dalan ni halak partigor, angke Ho do na mangarintis dalan disia.

⁸Hami patulus do giotMu, ale TUHAN, hum Ho sajo do haposannami dohot lungun ni rohanami.

⁹Muda borngin, sai Ho do dihalungunkon rohangku. Di manyogot pe, Ho do dihalungunkon tondingku. Muda manguhumi Ho sanoli on, tandaon ni na mangingani tano on ma hatigoranMu.

¹⁰Haru pe denggan Ho tu halak na jungkat, nada tarbaen halahi marsiajar na so jahat. Di negara uhum pe laing na so ture do i nada ra mangoku tu kuaso ni TUHAN i.

¹¹Ale TUHAN, di paherbang Ho do tanganMu, tapi nada diida halahi i; padiar ma maila halahi mida holong ni rohaMu di bangsoMi. Padiar ma marhancit halahi hara ni na hona uhum na niparadeMu di halahi.

¹²TUHAN, baenonMu ma hami sonang so haribo-riboan, sude sibaenonnami Ho do mangkarejohonsa.

¹³Ale TUHAN Debatanami! Madung bahat na unjung mangarajai hami; tapi hum Ho sajo do sioloannami.

¹⁴Ma pola marmatean halahi, nada be i mangolu mangulahi, nada ngot be sumangotna i sanoli nari. Angke madung abis halahi dironcohon Ho jana sian parningotan pe disesa Ho.

¹⁵Ditambai Ho bangsoMu marlompit ganda, ale TUHAN, jana dipabidang Ho luat ni halahi, dipasangap halahi ma Ho hara ni i.

¹⁶Ale TUHAN, hatiha na sompit dijalahi halahi do Ho, hatiha hona uhumMu, tu Ho do halahi pio-pio di bagasan tangiang.

¹⁷Songon dadaboru na giot tubu-tubuan marngeati jana marsurak dibaen hancitan, songon i hian ma hami di adopanMu, ale TUHAN.

¹⁸Denggan ma pamatangnami jana mangae na hancit, hape nada bagi aha sorang; nada mangalehen pangurupion tu tano on, nada muse manambai halak na manginganisa.

¹⁹Ale TUHAN bangsoMu na mate i mangolu ma mangulahi, angka bangke ni halahi ngot sanoli nari. Halak na dung ditanom di bagasan tano, ngot ma i jana marolop-olop. PangoluonMu ma bangsoMu na dung mate honok, songon ombun na pajagarkon tano.”

²⁰Masuk ma hamu tu bagasmunu i ale bangsongKu, lalu tutupkon ma pintuna i. Martabuni ma hamu sangombas lopus mombun rimas ni TUHAN.

²¹Na giot mijur ma TUHAN sian ingananNa di banua ginjang laho manguhumi pangisi ni tano on hara ni dosa ni halahi. PatorangonNa ma sude pamunuon na nibaen ni halahi di na buni. Nada tutup-tutupan ni tano i be angka na mate hona bunu i.