Read Batak Angkola JESAYA 29 Bible Online

JESAYA 29 - Batak Angkola bible

JESAYA 29

¹Marjaya ma kota Jerusalem na nigoaran langgatan ni Debata! Marjaya ma kota parundung-undungan ni si Daud! Padiar ma margonti-gonti taon tu taon songon i dohot angka pesta-pestana.

²Angka andung-andung dohot na tangis noma tarbege disi songon langgatan panutungan noma sude kota i.

³BaenonKu noma undung-undungKu di sude luat ni kota i giot mamorangi ho, jana laho mambuat inganan-inganan panjago laho mamata-mata i ho, jana pajongjongonKu ma angka kandang manghobuk ho.

⁴Angke patoruonmu noma dirimu jana marsora ma ho sian bagasan tano, alang-alang tarbege ma soramu sian bagasan abuan; pangkuling ni soramu songon sora ni begu sian toru ni tano.

⁵Hape na giot mago do sude parangan ni alomu songon abu sanga songon lapung diombuskon alogo. Na so niambang-ambang ompot ma

⁶paluaon ni TUHAN Na Markuaso i kota i marhite bade dohot lalo na gogo. ParoonNia halingsungsung dohot api na marjembur-jembur.

⁷Jadi mago ma sude parangan ni angka bangso na ro mamorangi Jerusalem, kota langgatan ni Debata i; sude sinjata dohot perlengkapan ni halahi, mago ma i sudena songon nipi sajo, angan-angan hatiha borngin.

⁸Sandok bangso na marlagut laho mamorangi Jerusalem songon halak na malean na marnipi mangan, tarsunggul, butuhana laing kosong, sanga songon halak na manguas marnipi minum, tarsunggul ia hape aru-arunia laing mahiang.

⁹Longang-longang ma hamu, gok hahomangan, padiar ma parnidaanmu tartutup, mapitung sajo! Mabuk mada hamu, tapi nada hara ni na minum anggur, lenong mada hamu, tapi nada hara ni na minum tuak.

¹⁰Dibaen TUHAN hamu mondohondok jana tarpodom sinok. Simalolongmu — i ma angka panurirang — madung dipapimpit Ia; jana bohimu — i ma angka partondung — madung dihungkupi Ia.

¹¹Buni ma di hamu arti ni sandok parnidaan, songon buku na nicap. Muda dioban ho tu halak na malo manyise, jana dipangido ho anso disise ia di ho, dokkononnia ma, nada malo au, angke dicap do antong buku i.

¹²Muda dioban ho i tu na buta hurup, jana didokkon ho: “Sise ma jolo on,” alusannia ma: “Nada malo au manyise.”

¹³Didok Tuhan, “Hum hata-hata sajo do angka jolma i manyomba Au, hape anggo roha ni halahi dao do sian Au. Hum paraturan ni jolma na niapil sajo do anggo ibadat ni halahi.

¹⁴Hara ni i, baenonKu ma parkaro halongangon tu bangso i, halongangon na pahomangkon roha. Gabe maoto ma halak na marroha, jana nada marguna be hamaloan ni halahi.”

¹⁵Marjaya ma sanga ise halak na giot manabunihon tahina sian TUHAN! Marsibuni-sibuni ma halahi mambaen sibaenonna, jana ning roha ni halahi nada adong sahalak pe na marnida sanga na umboto sanga aha na nibaen ni halahi.

¹⁶Dipabalik-balik halahi do sasudena. Sarupa dehe tano liat dohot sitopa hudon? Tarbaen ma he na nitopa i mandok tu sitopa hudon i, “Nada ho na mambaen au”? Sanga tarbaen barang i ma he mandok tusia, “So diboto ho antong na nibaenmu”?

¹⁷Adong do umpama na mandok, “Santongkin nari gabe parladangan noma tombak, jana parladangan mulak gabe tombak.”

¹⁸Muda tarjadi songon i, begeon ni na maingol ma buku na nisise gogo, jana marnida ma na mapitung na malua sian bagasan hagolapan.

¹⁹Angka halak na pogos jana na lebak hilalaonna ma hatuaan na nilehen ni TUHAN, Debata Na Badia ni Israel.

²⁰I ma ujungna barita ni angka jolma na mamisat halak na asing dohot ganop halak pardosa,

²¹na mamuratu mandok halak pardosa, na mambaen jorat tu halak na paingotkon dohot na manyosak halak na tigor markite-hite saksi pargabus.

²²Hara ni i, Debata ni Israel na paluahon si Abraham sian hasusaan, mandok saonnari, “Hamu bangsongKu, nada pabileon be hamu, jana bohimu pe nada langan-langan be hara ni na maila.

²³Muda diida hamu angka dakdanak na Hulehen tu hamu, gabe okuonmunu ma, Au do Debata Na Badia ni Israel. Pasangaponmunu ma Au, jana mabiar mida Au.

²⁴Marsiajar mangastui ma halak na dodong, jana mangastui ma roha ni halak na sai manjua diajari.”