Read Batak Angkola JESAYA 3 Bible Online

JESAYA 3 - Batak Angkola bible

JESAYA 3

¹Jana satutuna Tuhan, TUHAN Na Markuaso, giot padaoonNa sian Jerusalem dohot sian Juda sandok jolma na nipangasahon ni halahi, dohot sude parsadiaan panganon dohot siinumon,

²i ma angka na garang, parajurit, hakim, panurirang, partondung, pamimpin ni negara,

³pamimpin ni tentara, pamimpin ni halak na bahat, parpolitik, dohot angka halak na mardatu-datu laho mangarajai na adong on.

⁴PabangkitonKu ma angka na poso bulung gabe pamimpin ni halahi, jana angka dakdanak gabe mamarenta halahi.

⁵Hara ni i angkon marsisosakan ma bangso i, na sahalak tu na sahalak nari, na sada tu na asing; na umposo angkon manyonggak amangna dohot inangna, jolma na layas tu jolma na sangap.

⁶Jadi di hatiha i adong ma sahalak maniop kahanggina di bagas ni amangna, dung i mandok, “Adong dope jubamu, ho ma pamimpin di hami, jana angka na maronco on di toru kuasomu.”

⁷Di hatiha i dialusi ia ma, “Nada ra au gabe pangubati, di bagasku nada adong roti jana nada adong juba, ulang ma pabangkit au gabe pamimpin ni bangso.”

⁸Satutuna, Jerusalem madung maronco, jana Juda pe madabu, harana hata dohot pambaenan ni halahi mangalo TUHAN jana mangalo hasangapan ni harajaanNa.

⁹Bohi ni halahi patidahon hajahatanna, jana songon halak Sodom, patar-patar halahi paboahon angka dosana, nada ditabunihon be. Marjaya ma halahi! Angke diparo halahi do uhum tu dirina sandiri.

¹⁰Dokkon ma martua halak na tigor! Harana panganan ni halahi ma suha ni parkarejoanna.

¹¹Marjaya ma halak na jahat! Parmaraan angkon mandondoni halahi. Harana baloshononkon ma tu halahi hombar tu pambaenanna sandiri.

¹²Rajaan ni angka dakdanak ma bangsongKi jana parentaon ni dadaboru. Ale bangsongKu, pamimpinmunu i ma angka pangjago, jana dalan na dibolusmunu disego-sego halahi!

¹³Madung rade TUHAN laho mangaduhon jana mangadili angka bangso.

¹⁴Ro ma TUHAN songon panguhum maradopkon angka pamimpin ni bangsoNia. Songon on ma adu-adu ni TUHAN maradopkon halahi: “Ditangko hamu do suha ni angka kobun anggur, jana gok bagasmu dohot barang na nirampas sian halak na pogos.

¹⁵Nada adong hakmu laho mamisat bangsongKu dohot mamoro halak na pogos. Au Tuhan DEBATA Na Markuaso madung mandok songon i.”

¹⁶Didok TUHAN, “Ligi da, sombongna i angka boru Jerusalem! Mardalan halahi maradu gakgak. Humetek-hetek ma halahi manghidopi. Dipabaen-baen ma pangalangkana i jana mardoring-doring ma sora ni angka golang ni patna i.

¹⁷Hape uhumanKu noma halahi; sap ma uluna i rasa-rasaon lopus gabe palpalon.”

¹⁸Di hatiha i angkon buaton ni Tuhan ma sude parhiasan sian halahi; angka golang ni pat, jamang-jamang, dohot angka bulung-bulung,

¹⁹anting-anting; pontoh-pontoh; dohot angka basaen,

²⁰angka parhiasan ni ulu, angka golang rante ni pat, angka bobat, inganan ni miak na huskus;

²¹tintin parpadanan dohot anting-anting ni igung;

²²angka pakean pesta, angka juba, angka salendang; angka hajut;

²³angka sormin, angka kameja na sian linen, angka bulang dohot angka pakean luar.

²⁴Gabe muap busuk ma angka na huskus i, tali ma gonti ni bobat, ulu ni halahi na marobuk na jeges i gabe palpalon noma, angka pakean ni halahi na jeges-jeges i pe gontion ma dohot pakean na mardarang-derung; jana tihas ma gonti ni hajegeson i.

²⁵Angka halaklahi na maringanan disi, salang na gumogona i, mate di porang noma i.

²⁶Markutondo ma halak jana mangandungi di angka horbangan ni kota, jana kota i pe tudos ma tu anak boru na nipasalang na juguk di tano.