Read Batak Angkola JESAYA 34 Bible Online

JESAYA 34 - Batak Angkola bible

JESAYA 34

¹Ro ma hamu angka bangso marlagut, jana tangihon hamu ma. Marroan ma na satano on dohot sandok na mangolu di bagasanna manangihon.

²Muruk do TUHAN tu sandok bangso dohot tu sude parangan ni halahi. Didabu Ia ma uhuman tu halahi jana pusaonNa ma halahi.

³Nada kuburkonon angka bangke ni halahi tapi padiaron do i marbusuhan jana bau. Marrara ma angka dolok hara ni na marlapu mudar.

⁴Maropuk ma mataniari, bulan dohot angka bintang gabe abu, dibalun ma langit songon na mambalun karotes, jana mangkadampuk ma angka bintang i songon pardampuk ni angka bulung sian hayu anggur sanga hayu ara.

⁵Madung mangamuk podangKu di langit, jana saonnari honaan ni podang i ma bangso Edom na hona uhum i jana abiskonon noma i.

⁶Marlapu-lapu mudar dohot tabo-tabo do podang ni TUHAN, i ma mudar dohot tabo-tabo ni pahan-pahanan na nihaulkon. Pasingkopon ni TUHAN ma haul di Bosra, jana pamasaonNia ma pambantean marabis-abis di tano Edom.

⁷Marmatean ma angka jolma songon lombu riar dohot lombu jara-jara. Marrara ma tano hara ni mudar jana ditutupi tabo-tabo.

⁸Disi ma hatihana paluaon ni TUHAN ma Sion jana palalu hosom ma Ia tu angka musuNia.

⁹Maruba ma angka batang aek ni Edom gabe aspal, jana tanona i gabe barerang. Ujungna gara ma sude luat i songon aspal.

¹⁰Arian na borngin nada mintop jilamna i, jana marbual-bual ma timus sian i sapanjangna. Ditadingkon halak ma tano i kosong jana harsang sian abad tu abad jana nada adong sahalak pe na mamolussa.

¹¹Sipauk dohot undan noma na maringanan disi. Kosong ma baenon ni TUHAN tano i jana harsang songon na salpu i dompak so panompaon.

¹²Nada adong raja na mamarenta luat i, jana sude pamimpinna markehean sian i.

¹³Angka bagas godang bope angka hutana na martembok, gabe hatubuan ni ramba na marsuga noma i jana diingani anjing harangan dohot sipauk.

¹⁴Humadeap ma disi angka binatang panyoro; marsialus-alusan angka begu, jana disi ma begu borngin[11] manjalahi donganna.

¹⁵Marasar ma ulok hayu jana marpira mamodomkon, jana manapor; angka pidong pincala marlagut ma disi, marpasang-pasangan.

¹⁶Jalahi jana sise hamu ma Buku Ni TUHAN. Sada pe sian angka mahluk na mangolu i nada adong na mago sanga na so marpasangan. Songon i do parenta ni TUHAN, harana Tondi Ni TUHAN sandiri do na palagutkon halahi.

¹⁷Ia sandiri do na mambagi-bagi luat i di halahi jana ganop be marsijagit bagianna. Disi noma halahi maringanan salolot-lolotna, jana halahi noma nampuna tano i marsundut-sundut.