Read Batak Angkola JESAYA 39 Bible Online

JESAYA 39 - Batak Angkola bible

JESAYA 39

¹Laing di sahatiha i, tarbege ma tu raja Babel si Merodak-Baladan anak ni si Baladan, na baru malum Raja Hiskia sian nyaena. Jadi disuru ia ma halak maroban surat dohot silua tu si Hiskia.

²Marjop ni roha ma si Hiskia hara ni utusan i jana dipatuduhon ia sude sinadongan, i ma angka sere dohot perak, angka parmasak dohot miak na huskus, dohot sude perlengkapan ni tentarania. Nada adong be di bagas godang i dohot di sude harajaannia na nitabunihonnia tu halahi.

³Dung i ro ma Panurirang Jesaya mangadop tu Raja Hiskia lalu marsapa, “Isi ni dia dehe angka halak on? Aha didok halahi?” Dialusi si Hiskia ma, “Sian sihadaoan do halahi, sian Babel.”

⁴“Aha na niligi ni halahi di bagas godang?” ning si Jesaya muse manyapai. “Sasudena,” ning si Hiskia mangalusi. “Sada pe nada adong be na di bagasan bagas godang on na so hupatidahon tu halahi.”

⁵Jadi didok si Jesaya ma tu raja i, “Didok TUHAN Na Markuaso i,

⁶dapot do i hatihana sandok sinadongan na di bagasan bagas godangmon dohot na nipalagut-lagut ni ompumunu lopus tu sadari on, angkaton ma i tu Babel. Nada adong na tading.

⁷Sian angka pomparanmu adong ma i na giot buaton jana baenonna gabe pagawe bagas godang laho mangoloi raja ni Babel.”

⁸Dialusi Raja Hiskia ma, “Na denggan ma tutu Tona Ni TUHAN na nipalalumi tu au. Songon i pe alusnia, hara ni na didok rohania do, anggo tona i astuanna paboahon na hot do sonang harajaannia jana aman salolot di ngolunia.”