Read Batak Angkola JESAYA 41 Bible Online

JESAYA 41 - Batak Angkola bible

JESAYA 41

¹“Hohom ma hamu jana tangihon ma Au, ale angka pulo-pulo, sai mandapot gogo na imbaru ma angka bangso, padiar ma mandonok halahi jana mangkobari, marsidang ma hita laho marparkaro.

²Ise dehe na marsuru ia ro sian Habincaran i, na marsuru ia na mandapot hamonangan di sude langkana, na pataluhon angka bangso dohot raja-raja? Podangnia mambaen halahi songon abu, jana panania mambaen halahi songon durame na nipurpuran.

³Dikojar ia halahi jana malua do ia; dibolus ia do dalan na so jungada nibolus ni patna.

⁴Ise do na mambaen dohot mangkarejohon i sudena? Au TUHAN, na parjolo, na sian parmulaan mamio bangkit angka pomparan, jana tu na giot ro Au tongtong rap dohot halahi.

⁵Angka pulo madung mangaligisa jana gabe mabiar, angka sundut ni portibi on humitir-hitir; ro ma halahi mandonok.

⁶Marsiurupan ma angka halahi jana marsipandohonan na sada tu donganna, ‘Papir ma rohamu!’

⁷Tukang bosi paposkon roha ni panyopu sere, jana halak na palimuskon tumbaga pake martil patoguhon roha ni panopa diatas payahan. Didok ia ma, ‘Na denggan do da pamijormi’, lalu dipaku ia ma anso ulang humutur-hutur.

⁸Tapi anggo ho ale Israel, naposo todoan ni rohangKu, pomparan ni si Abraham do ho, ale-alengKu.

⁹Ho na dung Hubuat sian angka sundut ni tano on, jana Hupio sian suhi-suhina. Hudok ma tu ho: ‘NaposongKu do ho, madung Hupili ho jana nada tulahonKu be ho.’

¹⁰Ulang ho mabiar Au do rap dohot ho, Au do Debatamu, ulang heput ho. Hupatogu do ho, Hulehen pangurupion, Huondihon jana Hupalua ho.

¹¹Sapetona, sude halak na bingkas rimasna tu ho, angkon maila jana hodar; angka halak na mangalo ho, angkon songon sisoada jana ripur.

¹²Jalahanmu do angka musumu, tapi nada dapot ho halahi. Angka halak na marporang mangalo ho, angkon songon sisoada jana marhamagoan.

¹³Au TUHAN, Debatamu, maniop tangan siamunmu; ningKu do, ‘Ulang ho mabiar, urupanKu do ho.’ ”

¹⁴“Ulang ho mabiar ale ulok-ulok ni Jakob, ale halak Israel! Au do pangurupi di ho, ninna TUHAN, jana na manobus ho, i ma Na Sun Badia, Debata ni Israel.

¹⁵Hubaen do ho gabe songon rapan-rapan, papan pardege na margarigi na tajoman. Dirabi ho angka dolok jana diluntak ho, angka tor gabe guapak dibaen ho.

¹⁶Piaranmu ma halahi, lalu kehe habang diombus alogo i; baenon ni bade pe abis ma marserak halahi, hape ho sandiri marsurahi di bagasan TUHAN. Marjop ni roha ma ho, patunda ni Au Debata, di Au, Na Badia ni Israel ho marmoga-moga.

¹⁷Muda manguas bangsongKu na lebak i, manjalahi aek harana hiang aru-aruna i, Au TUHAN, alusanKu do tangiang ni halahi; nada tadingkonon ni Debata ni Israel bangsoNa i.

¹⁸Di angka dolok na gundul Hubaen mardalan batang aek, di tano napa marbuldak-buldak ma mual ni aek. Hubaen gabe ambar, angka padang gariang hian, mamincar ma aek sian tano na marigang.

¹⁹SuananKu ma hayu ares di halongonan, hayu akasia, hayu murad[14] dohot bona ni zetun. Husuan hayu sampinur di padang na bidang, dohot barangan songon i dohot tusam di lambungna.

²⁰Idaon ni halak ma i jana botoonna, bahaso Au TUHAN, Au do na mambaensa. Jadi astuan ni halahi ma i, Debata Na Badia ni Israel do na mambaen i tarjadi.”

²¹Didok TUHAN, raja ni Israel tu angka debata, “Aduhon ma parkaromu, lehen buktina muda tarbaen hamu!

²²Ro ma hamu tuson jana dokkon ma tu hami, aha do na giot tarjadi. Pajojor ma na masa di hatiha na salpu, patorang ma astuanna anso binoto tontu.

²³Paboa ma sanga aha na giot masa, anso hami boto na tutu ho debata. Baen ma jolo sada na marguna sanga na mambaen susa, anso mabiar hami jana homang roha.

²⁴Satutuna, sisoada do hamu dohot na nipambaenanmunu, jana hagigian sajo angka na marsomba tu hamu.

²⁵Madung Hupabangkit sahalak sian Habincaran,[15] sian Utara do ia ro manyerang. Lonca-loncaonnia ma parkuaso songon bustak songon sitopa hudon mangalonca-lonca tano liat.

²⁶Ise sian hamu na paboa alatan sian mulana anso tardok hami, ‘Tutu do i’? Hape nada jungada adong sian hamu na paboa alatanna, sahalak pe nada adong umbege hamu mandok hata.

²⁷Au do na parjolo paboahon barita i tu Sion; Husuru do suruanKu paboahon barita na denggan tu Jerusalem.

²⁸Di na Huparrohahon di tonga-tongamu, angka debata, sada pe nada adong na tarbaen mandok hata. Nada adong na tarbaen mangalusi sanga aha pe na Husapai.

²⁹Hamu sude nada adong gunana, nada margogo mambaen sanga aha. Patung sajo do hamu na nituang ni tangan ni jolma, gale jana nada margogo.”