Read Batak Angkola JESAYA 42 Bible Online

JESAYA 42 - Batak Angkola bible

JESAYA 42

¹“Ligi, indu do naposongKu na Hutiop, naposo todoan ni rohangKu, lomo do rohangKu disia. Madung Hulehen kuasongKu tusia, laho maroban hatigoran tu angka bangso sudena.

²Nada ra ia marsurak sanga pio-pio marsora na gogo, nada habegean sorania di tonga dalan.

³Arong na malapat i nada gotapkononna, api na midop-idop i nada intopkononna. Mardongan haburjuonna do patuduhonna tona i.

⁴Nada mose ia sanga malapat, lopus dipajongjong ia tona di tano on; sude pulo manghalungunkon pangajaranna.”

⁵Songon on ma didok Debata, TUHAN, na manompa langit jana na paherbangkonsa na manompa tano on dohot sude na tubu di ginjangna na mangalehen hosa tu angka jolma na manginganisa.

⁶“Au ma da TUHAN, na mamiohon ho, markite-hite hasintongan, na maniop tanganmu; madung Hubaen jana Hulehen ho gabe janji tu sude jolma gabe sinondang tu angka bangso;

⁷laho mambuka mata na mapitung; laho paruarkon na hona uhum sian bagas hurungan, angka halak na juguk di bagasan hagolapan sian hurungan.

⁸Au do TUHAN, i ma da goarKu, nada lehenonKu hamuliaonKu tu na asing. HabonggalonKu nada i pasahatonKu tu angka patung na nipambaenan.

⁹Angka na disurirangkon humani madung tarjadi, saonnari na imbaru noma sipaboaonKu tu hamu haru pe nada tarjadi dope i.”

¹⁰Endehon ma logu na imbaru di TUHAN, jana puji ma Ia sian sude parsuhi ni tano on. Gumadobur ma laut maradu sude isina, dohot angka pulo rap dohot sandok na manginganisa.

¹¹Puji ma Debata, ale parhorsihan dohot angka kota, pujion ni halak Kedar ma nian goarNia. Sian puncut ni dolok, na mangingani kota Sela marsurak marolop-olop marjop ni roha.

¹²Sai dipuji halak na maringanan di na dao ma TUHAN, pagodangkon Ia marhite logu puji-pujian.

¹³Ruar do TUHAN marporang songon ulubalang, madung hobas Ia, gogo do rohaNia laho marporang. Digora Ia ma pio-pio di parporangan, patuduhon kuasoNia di paraloan.

¹⁴“Honok ma tutu sai mangkohom Au, lolot ma na so Hualusi bangsongKu. Tapi saonnari dapot hatihana baenon tindakan, mangarar ma Au songon dadaboru na giot tubu-tubuan.

¹⁵HaromkononKu ma dolok dohot tor, Hupahiang duhut dohot angka hayu. Rura na paihut batang aek Hubaen gabe parhorsihan, jana Hupahiang angka ambar.

¹⁶Giot toguonKu na mapitung i mamolus dalan na so ditanda halahi Humani. Hagolapan Hubaen gabe na torang di halahi, dalan na margaba-gobi Hubaen mangornop. I ma janjingKu tu halahi jana patulusonKu ma sudena i.

¹⁷Sanga ise na porsaya tu patung ni gana-ganaan. Angkon marbalik tu pudi jana dapotan hailaan i ma angka na mandok tu patung gana-ganaan: ‘Ho ma debatanami!’ ”

¹⁸“Tangihon bo ale ho na maingol hamu na mapitung tole bo pamanat.

¹⁹Adong dope he na umpitung sian Israel naposongKu? Adong dope he na ummingol sian suruanKu?

²⁰O Israel, bahat do nian na niidamu, hape so diparrohahon ho, marbuka do nian pinggolmu, hape na so marbinege do.”

²¹TUHAN marpor ni roha mambaen anso malua, mangalehen pangajaranNia na godang jana marmulia.

²²Hape mangabis hona samun bangso i, tarjorat halahi, madabu martinggangan, hona tangkup halahi jana ditahan di hurungan; madung gabe talu halahi, jana nada adong na paluahon, gabe rampasan jana nada adong na mandok: ‘Paulak ma.’

²³Ise dehe sian hamu na ra mamasang pinggol na manangihon, na ra mamparrohahon jana manangihonsa tu hatiha na giot masa?

²⁴Ise do pasahatkon Israel tu na mangarampassa? TUHAN sandiri do, tuSia do hita mardosa. Nada marguru tu parentaNia pardalan ni ngolunta, jana nada taihutkon pangajaranNia.

²⁵Jadi gabe disombabkon Ia ma rimas ni rohaNia tu hita, jana dipamasa Ia porang na mambaen hita susa. Marsigorgor do murukNia pangabiskon halahi, hape nada i taboto jana nada marsiajar hita sian na tarjadi.