Read Batak Angkola JESAYA 47 Bible Online

JESAYA 47 - Batak Angkola bible

JESAYA 47

¹“Mijur jana juguk ma ho di gincat ni orbuk, ale bujing-bujing, boru Babel! Juguk ma ho di gincat ni tano, jana nada be marhabangsa, ale boru Kasdim! Harana nada be dohonon ho na jogi jana na jeges.

²Duda ma topung dohot batu; tanggalkon ma basaenmu, buka ma bajumu na jeges i, singkat ma abitmu manaripari aek i.

³Idaon ni halak ma ho na so marpakean, dilayasi jana dipaila-ila. Palalu hosom ma Au tu ho, jana nada haantahan sanga ise Au,”

⁴ninna Debata Na Badia ni Israel, TUHAN Na Markuaso do goarna.

⁵Tu Babel, “Juguk ma ho hohom jana masuk tu hagolapan, ale boru Kasdim! Nada tandaon be ho marhite goar: ‘Ratu ni angka bangso.’

⁶Najolo muruk Au tu bangsongKu, nada Huetong be halahi nampunangKu. Gabe Hupasahat tu ho, hape nada adong ibo ni rohamu, dohot do tu na tobang-tobang dipambaeni ho pangalaho na kejam.

⁷Di mulana diambang ho salolot-lolotna gabe ratu ho. Hape rohamu nada mangastui sanga bia ujungna di pudi.

⁸Hara ni i tangihon ma ale na manghaholongi hasonangan, didok rohamu malua ma ho jana sonang. Diambang ho ma ho na sun markuaso, jana na so adong be mangimbangi ho. Diambang ho na so mabalu be ho jana pomparanmu nada mago.

⁹Hape hum santongkin, di bagasan sadari sajo, tarjadi ma pangalaho na dua i rap ro. Haru pe dipake aji dohot jampi, laing dirampas do halaklahimi dohot anakmi.

¹⁰Aman dihilala ho di bagasan hajahatan, dipikir ho parbuatanmi nada haidaan. Dililuhon habisuhon dohot parbinotoan i do ho, gabe didokkon ho ma di bagasan rohamu, ‘Nada adong na asing sian au.’

¹¹Tondongon ni parmaraan ma ho, nada margogo ajimetmi pasidingkonsa. Ro ma parmaraan tu ho, nada bisa so simbilkononmu i marhite manyombahon haul. Ompot ma ro hamamate tu ho, songon na so diambang rohamu.

¹²Martahan sajo ma ho marhite sude ajimetmi, na nipakemu sian hamenehanmi. Betak na marguna do i mangurupi ho, laho mambiar-biari.

¹³Madung sorat ho hara ni bahat ni sipaingot. Piohon ma antong angka partondung, anso malua ho. Diparsiajari halahi do angka bintang, jana ditontuhon batas ni langit na hembang. Ganop bona ni bulan na imbaru diramal halahi ma bagianmu.

¹⁴Satutuna, songon durame na nitutung ni api do halahi, nada tarpalua halahi dirina sandiri. Milas ni apina nada na boti-boti, nada songon parsisuduan milas ni i.

¹⁵Aha ma he jasa ni pangaramal i di ho, na dung mangalehen sipaingot sian najolo? Markehean be do manadingkon ho; nada adong na ro mangurupi ho.”