Read Batak Angkola JESAYA 48 Bible Online

JESAYA 48 - Batak Angkola bible

JESAYA 48

¹Tangihon ma hata on, ale pomparan ni si Jakob, na mandok dirina marhite goar ni Israel, jana na nidok pomparan ni Juda; na marsumpa mangasahon goar ni TUHAN jana na mangokui Debata ni Israel, tapi nada sasintongna jana nada sian ias ni rohana.

²Nada hum i sajo, didok hamu dope pangisi ni kota na badia i hamu, na pasahat ngoluna tu Debata ni Israel, i ma TUHAN Na Markuaso i.

³Didok Debata ma tu Israel: “Di na honok madung Hulumbahon hian na giot masa, jana ompot do i Hubaen gabe tarjadi.

⁴Huboto do ho sijogal roha, kapala batu, pir songon bosi.

⁵Gabe sian najolo Hupaboa hian do i, dompak so tarjadi Hupabotohon humani, anso ulang didok ho: Gana-ganaanku na mangkarejohonsa, patung na hutuhil dohot patung na hutuang i na manyuruna.

⁶Madung dibege ho sudena i jana saonnari idaonmu noma i. Saonnari Hupataridahon angka pangalaho na imbaru, na so unjung dope Hubaritahon di hatiha na salpu.

⁷Saonnari Hupadiar i tarjadi; di hatiha na salpu nada adong dope na songon i. Sugari adong, pasti dokkononmu, ‘Madung sudena i huboto.’

⁸Nada ditangihon ho sanga diboto ho, jana pinggolmu pe nada tarbuka sian najolo; tapi Huboto do, bahaso na durako do ho, jana didok halak do ho pangalaosi mulai sian bortian.

⁹Hara ni goarKu, Huorom do murukKu, jana hara ni habonggalonKu Huhaholongi ho, hara ni i ma umbaen nada Hupangabis ho.

¹⁰Satutuna madung Hupaias ho, tapi nada songon perak, jana madung Huuji ho marhite hasusaan.

¹¹Hubaen on hara ni Au sandiri do, nada Hupadiar goarKu dipalayas martilako. Indangkan na ra Au mambagi hasangapanKi; nampunangKu do i, Au sandiri do nampuna i.”

¹²“Ale Israel, ho ma bangso na Hupiohon, Au Debatamu, Au do na parjolo dohot na parpudi.

¹³TanganKu do na mamayakkon ojahan ni portibi, jana tangan siamunKu do na pahembang langit i. Muda Hupio halahi, manigor rap udur do ro halahi.

¹⁴Marlagut ma hamu sude jana tangihon ma, ise dehe sian tonga-tonga ni halahi na paboahon sasudena i? Ia, na dihaholongi ni TUHAN i do na giot patuluskon hagiot ni TUHAN maradopkon Babel, jana na patuduhon hagogoon ni tangan ni TUHAN maradopkon halak Kasdim.

¹⁵Au do na mandok jana na mamiohon ia, Au do na parohon ia, jana sude parkarejoannia marsuha.

¹⁶Ro ma ho padonok ma tu Au jana tangihon ma, sian najolo do marsitangkas Au mandok hata; jana dompak tarjadi sudena i, disi do Au.” Saonnari au diutus Tuhan DEBATA jana dohot TondiNa au dipasingkop.

¹⁷Songon on ma pandokkon ni TUHAN, Partobusmu, Na Sun Badia, Debata ni Israel: “Au do TUHAN, Debatamu, na mangajari ho salaho tu na mangkorhon na denggan, na mangaramoti ho di dalan na angkon bolusonmu.

¹⁸Sugari na burju ho mangoloi aturanKu so pola lalap, gabe mardalan ma pasupasu tu ho songon batang aek na so unjung mahiang. Hamonangan marroan ma tu ho songon ombak ni laut na so unjung maradian.

¹⁹Angke pomparanmu angkon songon horsik, jana turunanmu songon horsik bahatna; goar ni halahi nada diagohon sanga diparsoada sian jolongKu.”

²⁰Kehe ma ho sian Babel, lojongi ma tu Kasdim baritahon ma mardongan jop ni roha. Baritahon ma sun tu dia: “Madung dipalua TUHAN Israel, naposoNia!”

²¹Nada manguas halahi, hatiha ditogu Ia halahi mamolus inganan na gariang. Diharuarkon Ia aek sian dolok batu di halahi. Dibola Ia dolok batu, gabe mamincar ma aek.

²²“Nada adong hadameon di halak parjahat!” ninna TUHAN.