Read Batak Angkola JESAYA 5 Bible Online

JESAYA 5 - Batak Angkola bible

JESAYA 5

¹Tangihon bo marende au salaho tu kobun anggur ni donganku. Adong do kobun anggur ni donganku di gincat ni tor na napu.

²Dipangkur ia tanona i, jana diambungkon ia angka batuna. Disuan ia anggur pilian, dipajongjong ia palas-palas inganan ni panjagona. Dihali ia sada lubang, pamoroan ni anggurna, lalu dipaintesa malamun parbatuna, hape na ancom do dapotsa.

³Jadi saonnari didok donganKi ma, “Hamu sude halak Jerusalem dohot Juda, hamu ma jolo mangadili antara kobun anggurKu dohot Au.

⁴Adong dope he ulaning na so Hubaen tu kobun anggurKi? Hape biasi ma angka na mancom batuna i jana nada denggan songon na niarop ni rohaniba?

⁵Antong, songon on noma baenonKu kobun anggurKi: AngkatonKu noma handang na humaliang kobun i, tembok na manjagohon kobun i pe rumpakkononKu noma i, padiaronKu ma angka binatang riar manjampali i lalu mandege-degesa.

⁶PadiaronKu noma disi martubuan hayu riar. Nada be tamboranKu tanona i jana bona ni anggur i pe nada be papangkas-pangkasonKu. Mur padiaronKu noma i tehe lombuton ni sihupi dohot andor-andor. Salang ombun pe antahanKu noma ulang diparo udan tusi.”

⁷Satutuna bangso Israel do kobun anggur ni TUHAN Na Markuaso i; jana halak Juda ma bona ni anggur na nisuanNia i. Diarop Ia hasintongan, tapi na ro hum harorangan. Diarop Ia hatigoran, tapi na ro hum hajahatan.

⁸Marjaya ma hamu! Ditobusi hamu ma angka bagas dohot angka ladang laho manamba sinadonganmunu. Nada sadia honok nari abis ma inganan di halak na asing jana hum hamu sajo noma na maringanan di luat i.

⁹Hubege do didok TUHAN Na Markuaso i, “Anggo angka bagas na godang-godang jana na jeges-jeges on, marumar noma i sudena nada adong be manginganisa.

¹⁰Tapi kobun anggur na nibajak di bagasan sampulu ari, hum sagunci noma suhana. Jana same na sinabur tolu pulu onom kaleng bahatna, hum santuhuk gandum noma sabionna.”

¹¹Marjaya ma hamu! Sian manyogot lalu tu borngin, hum na manginum siinumon na koras ma hamu jana marmabuk-mabuk.

¹²Di angka pestamunu habegean do sora ni hasapi, gambus, rapano dohot suling dohot na minum anggur. Hape nada diterge hamu anggo hagiot ni TUHAN dohot sanga aha na nibaenNa tu hamu.

¹³Hara ni i, toguon noma hamu kehe songon na tartaban. Mate tangkuraparon dohot manguas ma angka pamimpin dohot rayat.

¹⁴Maradu ngangang ma pamangan ni rura hamatean laho mambondut angka halak na godang di Jerusalem rap dohot rayat na somal marpesta i.

¹⁵Sandok jolma i angkon nipaila, jana halak na ginjang roha niparenjep.

¹⁶Tapi patuduhonon ni TUHAN Na Markuaso i ma hagodanganNia markite-hite na patuluskon sanga aha na tigor, jana Debata Na Sun Badia angkon patidahon habadiaanNa di bagasan hasintonganNa.

¹⁷Dung i angka biri-biri angkon manjampali di si songon di padangna sandiri jana angka hambeng manjalahi sipanganonna di bagasan ronco-ronco ni tembok ni halak na kayo.

¹⁸Marjaya ma halahi na manghail hasalaan dohot tali ni gabus, jana dosa songon tali ni garobak.

¹⁹Didok hamu, “Haru diompoti TUHAN Debata Na Badia ni Israel i ma nian patuluskon sangkapNia i anso taboto sanga aha maksudNia.”

²⁰Marjaya ma halahi na mandokkon hajahatan i denggan jana na denggan i na jahat, na manggonti hagolapan gabe torang jana na torang gabe hagolapan, na manggonti na paet gabe tonggi, jana na tonggi gabe na paet.

²¹Marjaya ma halahi hara ni na diambang dirina na bisuk jana na lobi pistar.

²²Marjaya ma halahi angka na gogo minum, jana na malo mancampur minuman na koras.

²³Marjaya ma hakim na patigorhon parjahat hara ni hepeng suap, jana na so patuduhon hasintongan tu halak na tigor.

²⁴Madung ditulakkon hamu pangajaran ni TUHAN Na Markuaso i, Debata Na Badia ni Israel. Hara ni i, songon durame dohot duhut na mahiang abis dipangan api, laing songon i muse ma angka urat-uratmunu gabe busuk, angka bungamunu pe malos ma i lalu abis diombuskon alogo.

²⁵Muruk TUHAN tu bangsoNia i. Madung rade Ia laho manguhumi halahi. Humutur ma angka dolok; marragean ma angka bangke songon rompak di angka dalan. Hape laing muruk dope TUHAN jana laing na giot manguhumi.

²⁶Baenon ni TUHAN ma sada tanda giot mamio bangso sian na dao. Mandosik ma Ia mamio halahi sian angka ujung ni tano on. Marroan ma halahi tibu jana hipas.

²⁷Nada adong sian halahi na gabe loja, sanga na tartuktuk. Nada modom sanga mondohondok halahi. Nada adong na mambuka bobatna, jana nada adong na gotap tali ni sipatuna.

²⁸Tajom do anak ni pana ni halahi jana siorna i ripe manembakkon. Sisilon ni kudona i songon pir ni batu loting, jana parputar ni roda ni karetana i songon hipas ni halingsungsung.

²⁹Angka parajuritna i songon singa na baru manangkup soroanna parngaurna, jana muda dilojongkonsa nada adong na bisa paluahonsa sian halahi.

³⁰Anggo di ari i tarbege ma di sude Israel parngiar ni porang sagogo ni ombak ni laut bidang. Ligi da, manggolap ma sudena luat i jana gok hasusaan. Gabe hagolapan marimpot-impot noma na torang i.