Read Batak Angkola JESAYA 52 Bible Online

JESAYA 52 - Batak Angkola bible

JESAYA 52

¹Jonggor ma, jonggor ma! Pake ma gogomu songon pakean ale Sion, pake ma pakean hamuliaonmi, ale Jerusalem kota na badia! Harana umpe sahalak na so disunat sanga na hodar nangkon masuk be tu ho.

²Paspaskon ma abu na lohot di pamatangmi, ngot ma ho, ale Jerusalem na nitaban! Talduskon ma ihot-ihot sian rungkungmu, ale boru Sion na tartaban!

³Didok TUHAN ma tu bangsoNia, “Nada margarar hamu digadis, jadi saonnari pe nada margarar hamu dipalua.”

⁴Jadi ninna TUHAN DEBATA ma: “Na jolo kehe do bangsongKu tu Mesir anso disi maringanan gabe halak asing, hape diparhanciti Asur ma hamu so bagi hara ni aha.

⁵Tapi saonnari, aha dope urusanKu di son? BangsongKu madung dirampas songon i sajo. Halahi na markuaso tusia, madung manyombong, songon i ma didok TUHAN, jana goarKu torus dipabile halahi ganop ari.

⁶Dapot do i hatihana, okuanmunu bahaso Au do Debata, jana Au mandok hata tu hamu.”

⁷Dengganna i antong haroro ni sioban barita, mamolus angka dolok ia mardalan. Dioban ia barita na denggan dohot barita haluaan, ning ia, “O Sion, Debatamu do Raja!”

⁸Tangihon ma sora na ribur sian panjago ni kota, bege ma surak-surak jop ni roha! Diida halahi sandiri TUHAN i ro tu Sion mangulahi.

⁹Ale sego-sego ni Jerusalem, marsurak ma marjop ni roha! Angke dipalua TUHAN bangsoNia jana diapoi Ia.

¹⁰Patuduhonon ni TUHAN ma tanganNia na badia i di adopan ni sandok bangso, jadi sandok ujung ni portibi manyaksihon na ro TUHAN paluahon.

¹¹Mandao ma ho, mandao ma ho! Ruar ma ho sian i! Ulang ho dais tu na hodar! Ruar ma ho sian tonga-tonga ni halahi, paias ma dirimu, ale hamu na maroban parkokas ni Bagas Ni TUHAN.

¹²Anggo sanoli on nada porlu kehe maradu tibu maporus palua diri pe nada porlu. Angke TUHAN Debatamu do manogu ho ondihononNia do ho sian sasude na ro.

¹³Satutuna, monang do naposongKu, pagincaton do ia, dipuji-puji jana dipasangap.

¹⁴Tarsonggot ma jolma na bahat marnidasa, jatjat rupana, songon na so Anak Ni Jolma do ia ligion.

¹⁵Tapi anggo saonnari bahat bangso homang hara ni ia, mangkohom angka raja hara ni longangna. Angke na so dibaritahon humani tu halahi, ligion ni halahi ma saonnari, dohot aha na so binege ni halahi, astuanna ma saonnari.