Read Batak Angkola JESAYA 54 Bible Online

JESAYA 54 - Batak Angkola bible

JESAYA 54

¹Marsurak-surak ma, o ale na so maruntungan, na so jungada manyorangkon! Marjop ni roha jana marsurak ma ho marmoga-moga, ale ho na so jungada manaon parhancitan i. Harana umbahat do dakdanak ni na so marhalaklahi sian na marhalaklahi, ninna TUHAN.

²Angkon pabidangon noma bandar ni ingananmu, paginjangonmu angka talina, jana patoguonmu sangkotanna.

³Pabidangonku ma tanomu tu siamun dohot siambirang, kota lobu gabe sumuang niinganan. Madung dijuguhi bangso na asing luatmunu tapi mulak do luat i gabe nampunamunu.

⁴Ulang ho mabiar, nada pola pailaon be ho; nada layasan jabat mangirput ho. Halupahononmu ma na so turemu dompak poso ho; dohot na lungunmu dompak mabalu ho.

⁵Harana na gabe halaklahimu i ma Ia Na Manompa ho, TUHAN Na Markuaso do goarNia; na gabe Sipaluamu i ma Na Sun Badia, Debata ni Israel, nigoaran do Ia, Debata ni sandok portibi.

⁶Harana dipiohon TUHAN do ho, songon ina na ditinggalkon jana marsak, songon ina na poso di hatiha ditulak ia, ninna Debatamu:

⁷“Sangombas do Huhudukkon ho, tapi sian holong ni roha na gok mangulahi Hubuat ho.

⁸Hara ni parpiar ni murukKu, Hutabunihon bohingKu, santongkin maradopkon ho. Tapi patuduhononKu ma tu ho holong ni rohangKu salolot ni lolotna.” Songon i ma na Hudok, Au Debata Sipalua ho.

⁹“Di hatiha ni si Nuh marjanji do Au, na so bonomon ni aek na oto be tano on. Saonnari marjanji Au na so muruk be sanga mangondam hamu bagi hum sanoli pe.

¹⁰Muncat pe angka dolok jana humutur dohot tor, tapi holong ni rohangKu nada muncat sian ho, jana janji hadameonKu nada morot sian ho,” ninna TUHAN, na manghaholongi ho.

¹¹“Ale na marhancit, na diombus ni alogo, na so diapuli! Satutuna, payakkononKu ma ojahanmu, dohot batu na lomlom dohot batu nilam.

¹²Dohot batu dalimo bangunonKu palas-palasmu, horbanganmu dohot batu na marsinondang, humirlap-hirlap songon api na marjilam, angka tembokmu sian batu parmata.

¹³Au sandiri mangajari angka anakmu, anso mangolu sonang nian boti makmur.

¹⁴Di gincat ni hatigoran ma pajongjongon ho. Dao ma sian ho angka na manindas ho, angke nada pola mabiar ho jana nada tarsonggot ho, angke nada ro be i tu ho.

¹⁵Muda adong na mangaroro tu ho, nada Au na marsuru, sanga ise na mangaroro ho, angkon talu do.

¹⁶Au do manompa tukang bosi, na manopa sinjata di bagasan api. Tapi Hubaen muse do na pasegohon, na mamake sinjata tu maksud na jahat.

¹⁷Tapi anggo sinjata na dipaadop tu ho, nada margogo i mamugangi ho. Jana tu sude tuduan, hata ro do di ho hata alusan. Huampini angka naposongKi anso sai monang.” Songon i ma pandok ni TUHAN.