Read Batak Angkola JESAYA 56 Bible Online

JESAYA 56 - Batak Angkola bible

JESAYA 56

¹Didok TUHAN ma tu bangsoNia i, “Patulus hamu ma sanga aha na tigor jana na tumbuk tu hagiotKu, angke ro ne ma Au paluahon hamu.

²Martua ma halak na mandalankon i, dohot Anak Ni Jolma na marojahan tusi: Na marningot Ari Sabat jana nada dilaosi ari i, dohot na mangorom dirina tu hajahatan.”

³Halak na asing na dung margabung dohot bangso ni TUHAN, ulang pola didok, “Nada paloason ni TUHAN da au marsomba tuSia rap dohot bangsoNia.” Halak na dung dipaias indangkon pola marpikir ia na so tarbaen ia gabe anggota ni bangso ni Tuhan, hum hara ni na so bisa be ia marpomparan.

⁴Tu halak sisongon i didok TUHAN do, “Muda dipasangap ho do Au marhite na marningot Ari Sabat, muda setia do ho tu parjanjianKu jana dipatulus ho na pasonangkon rohangKu.

⁵LehenonKu ma tu halahi di bagasan bagasKu, dohot di bagasan tembok-tembok ni ingananKu sada tanda parningotan dohot goar. Dumenggan dope i sian halaklahi dohot dadaboru. LehenonKu ma sada goar na manongtong tu halahi.”

⁶Tu angka halak na asing na dung masuk etonganna tu bangso ni TUHAN, na manghaholongi jana na mangoloi TUHAN, na pasangapkon Ari Sabat jana setia tu parjanjianNia, didok Tuhan do,

⁷“BoanonKu ma hamu tu dolokKu na badia i,[19] lehenonKu jop ni roha di hamu di bagas paribadatanKu. JagitonKu angka haul na nihaulkonmunu di langgatanKu. Goaran ma bagasKu bagas partangiangan ni sandok bangso.”

⁸Madung marjanji Tuhan DEBATA na dung pataruhon Israel bangsoNa i mulak sian habuangan, obanonNia muse do angka bangso na asing anso marsada dohot halahi.

⁹Ale angka binatang na di padang, ale angka binatang na di harangan, ro ma hamu mangan,

¹⁰angke angka na mapitung do anggo pamimpin ni bangsongKu! Nada diboto halahi bagi aha. Songon anjing panjago na so martunggu do halahi, tapi na modom sajo do halahi.

¹¹Songon anjing na songkal do halahi na so habutongan. Nada adong pikiran ni angka pamimpin i. Marsibaen roha-rohana do halahi jana marsijalahi untung tu dirina be.

¹²“Tole, minum anggur ma hita, jana tagogoi be ma na minum on! Tumabo dope ancogot ulang pado sadari on!”