Read Batak Angkola JESAYA 57 Bible Online

JESAYA 57 - Batak Angkola bible

JESAYA 57

¹Mate halak partigor, jana nada adong sahalak pe na mampardulihonsa; angka halak na alim hona sintak hosana, jana nada adong na mangantureskonsa; tutu, hara ni na dung rarat hajahaton, hona sintak ma hosa ni halak partigor.

²Jana masuk ma ia tu inganan na sonang; angka halak parroha na tigor dapotan paradianan do i di gincat ni podomanna.

³Tapi hamu, padonok hamu ma tuson, ale angka anak ni dadaboru tukang sihir, ale pomparan ni na markarosuan dohot siboru jalang!

⁴Ise do na nipartataanmunu? Ise do na niincahanmunu, hamu angka pargabus dohot pangalo?

⁵Ale angka halak na matutung dibaen hagiot ni daging donok tu angka hayu parbeguan, ditoru ni hayu na rimbun, ale angka halak na manyambol dakdanak di rura-rura, di bagasan holang-holang ni dolok batu.

⁶Dipalagut hamu angka batu na landit sian inganan i, lalu disomba hamu ma i. Diduruskon hamu anggur jana dipelehon hamu gandum tusi. Diambang hamu lakna sonang rohangKu mida i?

⁷Kehe do hamu tu puncu ni angka dolok laho pasahatkon pelean lalu pasombuhon hagiot ni sibukmunu.

⁸Dibaen hamu ma angka patung na so ture di pamalpal ni pintu ni bagas. Madung ditadingkon hamu Au. Dibuka hamu ma pakeanmunu lalu manaek ma hamu tu podoman na godang rap dohot haholongan ni rohamu na niupaanmu anso rap modom hamu. Jana disi ma dipapuas hamu hagiotmunu.

⁹Maroban miak na huskus do hamu mangadop Debata Molok, jana marragam angka na huskus; disuru ho do kehe angka suruanmu tu luat na dao, jana lalu tu banua toru inganan ni na mate.

¹⁰Hara ni pardalananmu na dao loja ma ho, tapi nada didok ho: “Nada adong arop ni roha!” Dapot ho do gogo na imbaru, hara ni i nada gale ho.

¹¹Tu ise ulaning ho humitir jana mabiar, gabe margabus ho, jana nada mangingot Au, sanga inda ditangihon ho Au. Nada he hara ni na sip jana Hupapitpit matangKu, gabe nada mabiar be ho tu Au?

¹²DohononKu ma sude haburjuonmu dohot sude pambaenanmu, tapi sude na i nada marguna di hamu.

¹³Muda marsurak ho, padiar ma gana-ganaanmi paluahon ho! Ombuson ni alogo ma halahi sude, angkon dihabangkon pangombus ni hosa. Tapi halak na marondingan tu Au angkon dapotan pusako di luat i jana punania ma dolokKu na badia i.

¹⁴Adong ma na mandok: “Buka ma, buka ma, parade ma dalan, angkati hamu ma batu partuktuhan sian dalan ni bangsongKu.”

¹⁵Angke songon on do pandok ni Na Gumincat jana Na Marmulia na marhabangsa salolotna jana Na Sun Badia goarNa: “Di inganan na gincat jana badia do habangsangKu, tapi rap muse do dohot halak na magopu jana na toruk rohana, laho pangoluhon arop ni roha ni halak na toruk roha dohot laho pangoluhon roha ni halak na magopu.

¹⁶Angke nada salolotna Au giot mamorso, jana nada giot salolotna Au muruk, anso ulang gabe gale halahi di jolongKu, hape Au do na mambaen hosa hangoluan.

¹⁷Hara ni hasalaan na mangahut tu dirinia sandiri do umbaen na muruk Au, Hu ajar do ia, Hutabunihon bohingKu dohot murukKu, tapi marbalik do ia mamolus dalan na nipili ni rohana.

¹⁸Madung Huida pangalaho ni halahi, tapi laing pamalumonKu jana toguonKu do ia jana paulahonKu markite pangapoion; dohot bibir ni halak na marsak roha.

¹⁹BaenonKu ma puji-pujian. Dame, hadameon ma di halak na dao dohot na donok. Didok TUHAN pamalumonKu do ia!

²⁰Tapi anggo parjahat, songon laut na so jungada demak do i jana torus gumalusak. Marbalun-balun ombakna i marobani bustak dohot rompak-rompak.

²¹Nada adong hasonangan ni roha ni pardosa,” ninna Debatangku.